Accessibility links

ئوتێڵێـکی دێرینی شـاری حه‌له‌بی سوریا به‌ ته‌قینه‌وه‌یه‌کی به‌هێز وێران ده‌بێت


ئوتێلێـکی دێرینی شـاری حه‌له‌بی سوریا ڕۆژی پـێـنجشه‌ممه‌ به‌ ته‌قینه‌وه‌یه‌کی به‌هێز وێران بوو. هه‌روه‌ها ژماره‌یه‌ک کوژراو و برینداریشی لێـکه‌وته‌وه‌ و زیانێـکی ماڵی گه‌وره‌شی به‌ ناوچه‌که‌ی ده‌وروبه‌ری گه‌یاندووه‌.
ئێدوارد یه‌رانیان په‌یامنێری ده‌نگی ئه‌مه‌ریکا له‌ قاهیره‌ ڕاپـۆرتی له‌م باره‌یه‌وه‌ ئاماده‌کردووه‌.
ڤیدیۆیه‌کی له‌سه‌ر یوتیوپ بڵاوکراوه‌ته‌، ته‌قینه‌وه‌یه‌کی به‌هێز له‌ حه‌له‌بی گه‌وره‌ترین شـاری سوریا نیشـان ده‌دات که‌ ئوتێل کارلتۆنی ته‌خت کردووه‌ و ته‌پ‌وتۆز و دوکه‌ڵێـکی به‌ شێوه‌ی قارچک به‌ ئاسماندا بردووه‌. هه‌روه‌ها هه‌تا دوری سه‌دان مه‌تر شوشه‌ی به‌ په‌نجه‌ره‌وه‌ نه‌هێشـته‌وه‌. بۆمبه‌کان له‌ ڕێگه‌ی تونێلێـکه‌وه‌ خرابوونه‌ ژێر ئه‌م ئوتێله‌ 150 سـاڵ ته‌مه‌نه‌ که‌ له‌ سه‌رده‌می عوسمانیـیه‌کانه‌وه‌ بنیادنرابوو. ده‌یان که‌س کوژران، له‌وانه‌ زۆربه‌یان سه‌ربازی حکومه‌ت بوون.
هێشـتا هێزه‌کانی حکومه‌ت قه‌ڵا و چه‌ندان گه‌ڕه‌کی مێژوویی شـاری دێرینی حه‌له‌بیان به‌ده‌سـته‌وه‌یه‌. چه‌کدارانی ئۆپـۆزسیۆنیش ده‌سـتیان گرتووه‌ به‌سه‌ر ناوچه‌کانی ده‌وروبه‌ر و باکور و ڕۆژهه‌ڵاتی شـاره‌که‌. له‌م دوایـیانه‌دا هێزه‌کانی ئۆپـۆزسیۆن قایل بوون گه‌مارۆی سه‌ر هه‌ردوو شـارۆچکه‌ی نوبل و زه‌هرا کۆتایی پـێبهێنن که‌ له‌ ژێر ده‌سـتی حکومه‌تدان.
فڕۆکه‌ جه‌نگیـیه‌کانی حکومه‌ت له‌وه‌تای مانگی دوازده‌ی سـاڵی ڕابردووه‌وه‌ به‌ بۆمبی به‌رمیلی که‌وتوونه‌ته‌ بۆرده‌مانکردنی ناوچه‌کانی ژێر ده‌سـتی ئۆپـۆزسیۆن له‌ حه‌له‌ب و ئه‌مه‌ش بووه‌ته‌ مایه‌ی کوژران و برینداربوونی سه‌دان که‌س. ژماره‌یه‌ک ڤیدیۆ له‌سه‌ر تۆڕه‌کانی کۆمه‌ڵایه‌تی بڵاوکراونه‌ته‌وه‌ نیشـانی ده‌ده‌ن چه‌ندان باڵه‌خانه‌ به‌ ژماره‌یه‌کی زۆری دانیشـتوانه‌که‌ی به‌م بۆردومانانه‌ ته‌خت بوون.
ته‌قینه‌وه‌یه‌کی دیکه‌ی نێو تونێل له‌ زوویه‌کی ئه‌م هه‌فته‌یه‌دا له‌ ژێر بنکه‌یه‌کی له‌شـکری حکومی له‌ نزیک شـارۆچکه‌ی معه‌رت ئه‌لنوعمان له‌ پارێزگای ئیدلیب کوژرانی ده‌یان سه‌ربازی لێـکه‌وته‌وه‌. چالاکوانانی ئۆپـۆزسیۆن ده‌ڵێن سه‌رهه‌ڵداوان به‌ درێژایی 50 ڕۆژ ئه‌و تونێله‌یان لێداوه‌.
ڤیدیۆیه‌کی سه‌ر تۆڕه‌کانی کۆمه‌ڵایه‌تی نیشـانی دا چه‌کدارانی ئۆپـۆزسیۆن تونێـلێـکی له‌و جۆره‌یان له‌ شوێنێـکی باکوری سوریا لێداوه‌. چه‌کداره‌کان زۆربه‌یان گه‌نج بوون و باسیان له‌ کاره‌که‌یان بۆ که‌سانێـک ده‌کرد که‌ سه‌ردانیان کردبوون.
سه‌رچاوه‌کانی حکومه‌تی سوریا ئیدیعا ده‌که‌ن له‌م دوایـیانه‌دا چه‌ند تونێـلێـکیان تێـکداوه‌ که‌ له‌ لایه‌ن چه‌کدارانی ئۆپـۆزسیۆنه‌وه‌ له‌ ناوچه‌ی جوبه‌ری دیمه‌شق هه‌ڵیانکه‌نیبوون. پـێشـتر جوبه‌ر بووبووه‌ بنکه‌ و قه‌ڵایه‌کی چه‌کدارانی ئۆپـۆزسیۆن، به‌ڵام له‌ ئێسـتادا هێزه‌کانی حکومه‌ت زۆربه‌یان گرتۆته‌وه‌.
فه‌رمانده‌یه‌کی هێزه‌کانی ئۆپـۆزسیۆن له‌ حومسی سێـیه‌م گه‌وره‌ترین شـاری سوریا‌ باس له‌ ڕێـکه‌وتنه‌که‌ی له‌گه‌ڵ حکومه‌ت ده‌کات بۆ ئاڵوگۆڕکردنی ده‌سـتگیرکراوان له‌ چه‌ند به‌شێـکی وڵاته‌که‌. ئه‌و سووره‌ له‌سه‌ر ئه‌وه‌ی ڕێکه‌وتنه‌که‌ ئاگربه‌ست نیـیه‌. ڤیدیۆیه‌کی سه‌ر تۆڕه‌کانی کۆمه‌ڵایه‌تی نیشـانی دا ژماره‌یه‌ک سه‌ربازی حکومه‌ت ئه‌مڕۆ پـێـنجشه‌ممه‌ ئازادکران وه‌ک به‌شێـک له‌ ڕێکه‌وتنه‌که‌.
پارێزگاری حومس ته‌لال به‌رازی له‌سه‌ر که‌ناڵی ته‌له‌فیزیۆنی حکومه‌تی سوریا گوتی کاروانی سێـیه‌می چه‌کدارانی ئۆپـۆزسیۆن ئه‌مڕۆ پـێنجشه‌ممه‌ ڕێگه‌ی پـێده‌درێت شـاره‌که‌ جێبهێڵت. هه‌روه‌ها چه‌ند ڤیدیۆیه‌کی دیکه‌ی سه‌ر تۆڕه‌کانی کۆمه‌ڵایه‌تی نیشـانیان دا چه‌ند گرووپـێـکی چه‌کدار له‌ ماوه‌ی 48 کاژمێری ڕابردوودا حومسیان جێهێشـتووه‌.
please wait

No media source currently available

0:00 0:03:24 0:00
Direct link
XS
SM
MD
LG