Accessibility links

وه‌زیری به‌رگری میسر ده‌سـتی له‌ پـۆسته‌که‌ی ده‌کێشێته‌وه‌ و خۆی بۆ سه‌رۆکایه‌تی کاندید ده‌کات

  • VOA News

I

I

عه‌بدولفه‌تاح ئه‌لسیسی سه‌رۆکی له‌شکری میسر، ئه‌وه‌ی هاوینی ڕابردوو محه‌مه‌د مورسی سه‌رۆکی هه‌ڵبژێردراوی له‌ پـۆسته‌که‌ی لادا، ڕایگه‌یاند که‌وا خۆی بۆ هه‌ڵبژاردنه‌کانی داهاتووی سه‌رۆکایه‌تی کاندید ده‌کات.
سیسی شه‌وی چوارشه‌ممه‌ له‌ وتارێـکیدا که‌ له‌ ڕێگه‌ی ته‌له‌فیزیۆنه‌وه‌ په‌خش کرا، گوتی ئه‌و وه‌ک وه‌زیری به‌رگری ده‌ستی له‌ کاره‌که‌ی ده‌کێشێته‌وه‌‌ و ئه‌مه‌ دوا جار ده‌بێت به‌ جل‌وبه‌رگی له‌شـکریـیه‌وه‌ ده‌ربکه‌وێت.
پاشـان گوتی ئه‌م سـاڵانه‌ی دوایی سه‌لماندی که‌س به‌بێ خواست و پشـتیوانی گه‌لی میسر ناتوانێت بـبێته‌ سه‌رۆکی ئه‌م وڵاته‌، وه‌ هیچ که‌سێـکیش ناتوانێت میسریـیه‌کان ناچار بکات سه‌رۆکێـک هه‌ڵبژێرن که‌ نه‌یانه‌وێت.
سیسی جه‌ختی له‌وه‌ش کرد وڵاته‌که‌ی ده‌ست وه‌رناداته‌ کاروباری هیچ وڵاتێـک و ڕێگه‌ش به‌ هیچ هێزێـکیش نادات ده‌ست له‌ کاروباری میسر بدات.
دواتر گوتی به‌نیازه‌ خۆی بۆ هه‌ڵـبژاردنه‌کانی سه‌رۆکایه‌تی کاندید بکات و چاوه‌ڕوانی پشـتیوانی خه‌ڵکه‌.
پـێشـبینی ده‌کرێت سیسی ته‌مه‌ن 59 سـاڵ سه‌رکه‌وتن له‌ هه‌ڵبژاردنه‌کاندا به‌ده‌سـتبهێنێت، له‌و وڵاته‌ی له‌وه‌تای سـاڵی 1952 وه‌وه‌ که‌سانێـک سه‌رۆکایه‌تیـیان کردبوو که‌ ڕابردوویه‌کی له‌شـکریـیان هه‌بووه‌، جگه‌ له‌و یه‌ک سـاڵه‌ی محه‌مه‌د مورسی سه‌رۆکایه‌تیـیه‌که‌ی گرتبووه‌ ده‌ست.
به‌پـێی دوایـین هه‌واڵ ئه‌مڕۆ پـێنجشه‌ممه‌ عه‌بدولفه‌تاح ئه‌لسیسی به‌ فه‌رمی داوای ده‌سـت له‌کارکێشانه‌وه‌ی خۆی پـێشکه‌ش به‌ ئیبراهیم مه‌حله‌ب سه‌رۆکی ئه‌نجومه‌نی وه‌زیران کرد‌ و ئه‌ویش لای خۆیه‌وه‌ قبوڵی کردووه‌. پاشان فه‌ریق سدقی سوبحی سه‌رۆکی ئه‌رکانی له‌شـکری میسر سوێندی یاسای خوارد وه‌ک وه‌زیری به‌رگری له‌ به‌رده‌م عه‌دلی مه‌نسور سه‌رۆکی کاتی میسر.
XS
SM
MD
LG