Accessibility links

حزبوڵای لوبنان هه‌ڕه‌شه‌ی تۆڵه‌ سه‌ندنه‌وه‌ له‌ ئیسرائیل ده‌کات


ڕێکخراوی میلیشیایی حزبوڵای لوبنان ده‌ڵێت ڕۆژی دووشه‌ممه‌ ئیسرائیل هێرشێکی ئاسمانی کردۆته‌ سه‌ر ناوچه‌کانی حزبوڵا له‌ نزیک سنوری سوریاوه‌ و په‌یمانی تۆڵه‌ سه‌ندنه‌وه‌شی داوه‌ دژ به‌و هێرشه‌ی به‌ په‌لامارێکی ئاشکرا ناودێری کردووه‌.

حزبوڵای لوبنان له‌ ڕاگه‌یاندنه‌که‌ی ئه‌مڕۆ چوارشه‌ممه‌یدا ئاماژه‌ی به‌وه‌ش کردووه‌ هێرشه‌که‌ی دووشه‌ممه‌ هیچ زیانێکی گیانی نه‌بووه‌ و جه‌ختیش ده‌کاته‌وه‌ له‌وه‌ی ڕێکخراوه‌که‌ خۆی کات و شوێنی وه‌ڵامی خۆی بۆ ئه‌و هێرشه‌ ئاسمانیه‌ی ئیسرائیل دیار ده‌کات.

تا ئاماده‌کردنی ئه‌م هه‌واڵه‌ ئیسرائیل ئه‌م هێرشه‌ ئاسمانیه‌ی نه‌ پشتڕاست کردۆته‌وه‌ و نه‌ نکوڵیشی لێکردووه‌.

به‌نیامین نه‌ته‌نیاهۆ، سه‌ره‌ک وه‌زیری ئیسرائیل ڕۆژی سێشه‌ممه‌ گوتوویه‌تی حکومه‌تی ئیسرائیل باس له‌و ورده‌کاریانه‌ ناکات چی ده‌کات یان چی ناکات، ته‌نها ئه‌وه‌نده‌ نه‌بێت گوتوویه‌تی ڕێوشوێنی پێویست ده‌گرێته‌به‌ر بۆ پاراستنی گه‌لی ئیسرائیل.

حزبوڵای لوبنان هاوپه‌یمانی به‌شار ئه‌لئه‌سه‌د سه‌رۆکی سوریایه‌ و جه‌نگاوه‌رانی خۆیشی ناردۆته‌ سوریا بۆ یارمه‌تیدانی ڕژێمی سوریا دژ به‌ سه‌رهه‌ڵداوانی وڵاته‌که‌.

ئه‌گه‌ریش پشتڕاستکرایه‌وه‌ ئه‌وا هێرشه‌ ئاسمانیه‌که‌ی ڕۆژی دووشه‌ممه‌ یه‌که‌م هێرشی ئیسرائیل ده‌بێت بۆسه‌ر خاکی لوبنان له‌وه‌تای ده‌ستپێکردنی قه‌یرانی سوریا له‌ مانگی 3 ی ساڵی 2011 ه‌وه‌.
XS
SM
MD
LG