Accessibility links

حکومه‌تی سوریا: ڕێگا به‌ ژنان و منداڵان ده‌درێت له‌ شاری حومس ده‌ربچن


نێردراوی تایبه‌تی نه‌ته‌وه‌ یه‌کگرتووه‌کانی و کۆمکاری عه‌ره‌ب له‌خزه‌ر براهیمی ده‌ڵێت نوێنه‌رانی حکومه‌تی سوریا له‌ وتووێژی ئاشتی له‌ ژنێڤ قائیل بوون به‌وه‌ی ڕێگا بدرێت خانمان و منداڵان له‌ شاری حومسی گه‌مارۆ دراو ده‌ربچن.
حو‌مس یه‌کێکه‌ له‌ گه‌وره‌ترین شاره‌کانی سوریا و به‌رده‌وام له‌ژێر هێرشی له‌شکری حکومه‌تی سوریادا بووه‌ تا ده‌ستی به‌سه‌ردا بگرنه‌وه‌ و له‌ سه‌رهه‌ڵداوانی وڵاته‌که‌ی بسه‌ندنه‌وه‌.
ئه‌م هه‌نگاوه‌ش دوابه‌دوای دوو خولی وتووێژ بوو له‌ ڕۆژی یه‌کشه‌ممه‌ له‌ نێوان نوێنه‌رانی حکومه‌تی سوریا و ئۆپۆزسیۆن به‌ ناوبژیوانی نه‌ته‌وه‌ یه‌کگرتووه‌کان.
له‌ وتووێژه‌کانی سه‌رله‌به‌یانی ڕۆژی یه‌کشه‌ممه‌دا سه‌نگی خرایه‌ ‌ سه‌ر ئازادکردنی هه‌زاران گیراو له‌وانه‌ خانمان و منداڵان و خه‌ڵکی به‌ ته‌مه‌نیش له‌ زیندانه‌کانی سوریادا.
له‌ میانه‌ی کۆنفرانسێکی ڕۆژنامه‌گه‌ریدا براهیمی ڕایگه‌یاند ئۆپۆزسیۆنیش قائیل بووه‌ به‌ داواکارییه‌که‌ی حکومه‌ت بۆ ئازاد کردنی ژماره‌یه‌ک له‌ گیراوه‌کانی که‌ له‌لایه‌ن گروپه‌ سه‌رهه‌ڵداوه‌کانه‌وه‌ گیراون.
XS
SM
MD
LG