Accessibility links

ئه‌مه‌ریکا و به‌ریتانیا و فه‌ڕه‌نسـا خشته‌ی کاتیان له‌ بڕیاری تایبه‌ت به‌ کیمیاویـیه‌که‌ی سوریا ده‌وێت

  • VOA News

ئه‌مه‌ریکا و فه‌ڕه‌نسـا و به‌ریتانیا کۆکن له‌سه‌ر پـێویسـتی ده‌رکردنی بڕیارێـکی توند له‌ لایه‌ن نه‌ته‌وه‌ یه‌کگرتووه‌کانه‌وه‌ که‌ خشته‌یه‌کی کاتی وردی تێدابێت بۆ دوا مۆڵه‌ته‌کانی له‌ به‌رده‌م سوریادا ده‌بن‌ به‌ مه‌به‌سـتی ده‌ستبه‌رداربوونی له‌ چه‌که‌ کیمیاویـیه‌کانی.
وه‌زیری ده‌ره‌وه‌ی به‌ریتانیا ولیه‌م هه‌یگ ڕۆژی دووشه‌ممه‌ گوتی ئه‌رکه‌که‌ قورس و ئاڵۆزه‌، به‌ڵام جه‌ختی کرده‌ سه‌ر پـێویستی بۆ هێشـتنه‌وه‌ی گوشـار له‌سه‌ر حکومه‌تی به‌شـار ئه‌سه‌د.
ولیه‌م هه‌یگ گوتی ئه‌وه‌ ڕژێمی ئه‌سه‌ده‌ چه‌کی کیمیاوی عه‌مبارکردووه‌ و چه‌ندین جار له‌ دژی خه‌ڵـکی سوریا به‌کارهێناوه‌، بۆیه‌ گوشارخستنه‌ سه‌ریان بۆ جێبه‌جێـکردنی ته‌واوی ئه‌م ڕێـکه‌وتنـنامه‌یه‌یه‌. گوتیشی جیهان ده‌بێت ئاماده‌بێت بۆ به‌رپـرسیاریکردنیان ئه‌گه‌ربێت و جێبه‌جێـیان نه‌کرد، وه‌ ئه‌مه‌ریکا و فه‌ڕه‌نسا و به‌ریتانیا له‌سه‌ر ئه‌م کاره‌ سوورن.
ولیه‌م هه‌یگ له‌ پاڵ وه‌زیری ده‌ره‌وه‌ی فه‌ڕه‌نسـا لۆران فابیۆس و وه‌زیری ده‌ره‌وه‌ی ئه‌مه‌ریکا جان کێری ئه‌م لێـدوانه‌ی دا له‌ پاش کۆبوونه‌وه‌یان له‌ پاریس. وتووێژه‌کان چه‌ند ڕۆژێـک پاش ڕاگه‌یاندنی پـلانێـکی ئه‌مه‌ریکا و ڕووسیا سـازکران که‌ تیایدا داوا له‌ سوریا ده‌کرێت ورده‌کاری له‌سه‌ر چه‌که‌ کیمیاویـیه‌کانی بدات. حکومه‌تی سوریاش په‌یمانی داوه‌ پابه‌ندی بـبێت.
ڕۆژی دووشه‌ممه‌ جان کێری گوتی هه‌ر چ شـتێـک که‌متربێت له‌وه‌ی حکومه‌تی سوریا به‌ ته‌واوی وابه‌سته‌ی بڕیارێـکی نه‌ته‌وه‌ یه‌کگرتووه‌کان بێت جێـگه‌ی قبوڵ نیـیه‌. گوتیشی له‌ پاش دورخستنه‌وه‌ی چه‌که‌ کیمیاویـیه‌کان له‌ ده‌سـتی هێزه‌کانی ئه‌سه‌د پـێویسته‌ کار بۆ بڕیارێـکی سیاسی بکرێت به‌ مه‌به‌ستی کۆتایی‌هێنان به‌ توندوتیژی ناو ئه‌و وڵاته‌.
سوریا ده‌ڵێت چه‌کدارانی ئۆپـۆزسیۆن چه‌کی کیمیاویـیان له‌ هێرشه‌که‌ی مانگی ڕابردووی قه‌راغ شـاری دیمه‌شق به‌کارهێناوه‌، نه‌ک هێزه‌کانی حکومه‌ت.
XS
SM
MD
LG