Accessibility links

تورکیا باڵیۆزه‌که‌ی ده‌نێرێته‌وه‌ بۆ میسر


ڕه‌جه‌ب ته‌یب ئه‌ردۆغان سه‌ره‌ک وه‌زیری تورکیا ده‌ڵێت باڵیۆزی تورکیا بۆ میسر ده‌ست ده‌کاته‌وه‌ به‌ ئه‌رکه‌کانی خۆی له‌ قاهیره‌.

پێشتر تورکیا باڵیۆزی خۆی له‌ قاهیره‌ گه‌ڕاندبووه‌وه‌ به‌هۆی ئه‌و پشێوی و ئاڵۆزیه‌ی له‌ په‌یوه‌ندیه‌کانیاندا هه‌بوون.

له‌ لێداونه‌کانی ڕۆژی چوارشه‌ممه‌یدا سه‌ره‌ک وه‌زیری تورکیا خۆی لادا له‌ وه‌ڵامدانه‌وه‌ی پرسیاری ئه‌وه‌ی ئایا ده‌کرێت گه‌ڕانه‌وه‌ی باڵیۆز حوسه‌ین ئانڤی به‌ هه‌نگاوێک ڕووه‌و ئاساییکردنه‌وه‌ی په‌یوه‌ندیه‌کانی ئانکه‌ره‌ و قاهیره‌ دابنرێت یان نا، ته‌نها ئه‌وه‌نده‌ نه‌بێت گووتی تاووتوێی هه‌ڵوێستی دیپلۆماتی ده‌کرێت ئه‌گه‌ر هه‌ل و مه‌رجی میسر وه‌رچه‌رخانێکی جیاوازی به‌ خۆوه‌ بینی.

کاربه‌ده‌ستێکی میسری ده‌ڵێت وه‌ها چاوه‌ڕوان ده‌کرێت ڕۆژی 5 شه‌ممه‌ باڵیۆزی تورکیا بگاته‌وه‌ قاهیره‌.

پاش ئه‌وه‌ی تورکیا به‌ توندی ڕه‌خنه‌ و ناڕه‌زایی ده‌ربڕی به‌رامبه‌ر له‌کار لادانی موحه‌مه‌د مورسی سه‌رۆکی پێشوی میسر هه‌ردوو وڵات باڵیۆزه‌کانی خۆیان کێشایه‌وه‌.

پێشتریش عه‌دلی مه‌نسور ، سه‌رۆکی کاتیی میسر له‌ ڕاگه‌یاندنێکدا گوتوویه‌تی پێویسته‌ تورکیا له‌ به‌رژه‌وه‌ندیه‌کانیدا سه‌نگی بخاته‌ سه‌ر میسر و گه‌لی میسری نه‌ک ڕێبه‌رانی لایه‌نێکی دیاریکراو له‌ میسردا، وه‌ک ئاماژه‌یه‌ک به‌ ئیخوانولموسلمینه‌کانی میسر.
XS
SM
MD
LG