Accessibility links

حامد کارزایی سه‌رۆکی ئه‌فغانستان ڕۆژی دووشه‌ممه‌ سه‌ردانی پاکستان ده‌کات و له‌وێش له‌گه‌ڵ نه‌واز شه‌ریف سه‌ره‌ک وه‌زیری پاکستان کۆ ده‌بێته‌وه‌.

وه‌ها چاوه‌ڕوان ده‌کرێت به‌ڕێز کارزایی هه‌وڵ بۆ به‌ده‌ستهێنانی یارمه‌تی پاکستان بدات بۆ‌ ڕێکخستنی وتووێژ له‌ نێوان دانوستاندکارانی ئه‌فغانی و نوێنه‌رانی تاڵیبانه‌کاندا.

ده‌مێکه‌ ڕێبه‌رانی ئه‌فغانی ده‌ڵێن پاکستانی دراوسێیان داڵده‌ی گه‌وره‌ سه‌رکرده‌کانی تاڵیبانیان داوه‌ و ده‌شڵێن ده‌زگای موخابه‌راتی پاکستان یارمه‌تی یاخیبووان ده‌دات بۆ هێرشکردنه‌ سه‌ر هێزه نێونه‌ته‌وه‌ییه‌کانی به‌ ڕێبه‌رایه‌تی وڵاته‌ یه‌کگرتووه‌کانی ئه‌مریکا و هێزه‌ ناوخۆییه‌کانیش له‌ ئه‌فغانستاندا.

ئیسلام ئاباد نکوڵی له‌و قسه‌ و باسانه‌ ده‌کات.

موحه‌مه‌د عومه‌ر داودزای، باڵیۆزی کابوڵ بۆ ئیسلام ئاباد ده‌ڵێت ئه‌فغانستان و پاکستان شکستیان هێناوه‌ له‌وه‌ی به‌ره‌وپێشچونیان هه‌بێت له‌ بواری ئاسایشیدا، به‌ڵام بواره‌کانی تری په‌یوه‌ندیه‌کان تۆکمه‌ تر بوون.

ده‌مڕاستی وه‌زاره‌تی ده‌ره‌وه‌ی پاکستان ده‌ڵێت سه‌ردانه‌که‌ی حامد کارزایی نیشانه‌یه‌که‌ که‌ ڕێبه‌رانی هه‌ردوو وڵات په‌ره‌سه‌ندنی زیاتری په‌یوه‌ندیه‌کانیان ده‌وێت.
XS
SM
MD
LG