Accessibility links

کۆبونه‌وه‌ی ئێران و کۆمه‌ڵگای نێونه‌ته‌وه‌یی


به‌ڕێوه‌به‌ری سیاسه‌تی ده‌ره‌وه‌یی یه‌کێتی ئه‌وروپا ده‌ڵێت به‌م زووانه‌ له‌گه‌ڵ وه‌زیری نوێی ده‌ره‌وه‌ی کۆماری ئیسلامی ئێراندا کۆده‌بێته‌وه‌.

ئه‌م کۆبوونه‌وه‌یه‌ش وه‌ک کاترین ئاشتن ده‌ڵێت له‌ نێوه‌ندی پێویستیه‌کانه‌ بۆ وتووێژێکی خێرا و ڕیالیستیکی سه‌باره‌ت به‌ به‌رنامه‌ ناوکیه‌ مشت و مڕ له‌سه‌ره‌که‌ی ئێران.

ئۆفیسی خانم ئاشتن ده‌ڵێت گه‌وره‌ دیپلۆماتی 28 وڵاته‌که‌ی یه‌کێتی ئه‌وروپا ڕۆژی شه‌ممه‌ په‌یوه‌ندیی ته‌له‌فونی له‌گه‌ڵ (موحه‌مه‌د جه‌واد زه‌ریف) وه‌زیری ده‌ره‌وه‌ی ئێراندا کردووه‌ به‌مه‌به‌ستی پیرۆزبایی لێکردنی ‌بۆ وه‌رگرتنی پۆسته‌که‌ی.

کاترین ئاشتن ده‌ڵێت خۆیی و ئه‌و وڵاتانه‌ی دانوستاندن له‌گه‌ڵ ئێران ده‌که‌ن له‌سه‌ر دۆسێی ناوکی واته‌ پێنج ئه‌ندامه‌ هه‌یشه‌ییه‌که‌ی ئه‌نجومه‌نی ئاسایشی نه‌ته‌وه‌ یه‌کگرتووه‌کان و ئه‌ڵمانیاش چاویان له‌وه‌یه‌ به‌ زوویی له‌گه‌ڵ تیمی نوێی دانوستانکاری ئێرانیدا هه‌ر که‌ دیارکرا کۆببنه‌وه بۆ دۆزینه‌وه‌ی چاره‌سه‌ریه‌کی دیپلۆماسیانه‌ی قه‌یرانی ناوکی ئێران.

ڕۆژئاوا ترس و نیگه‌رانی هه‌یه‌ له‌وه‌ی به‌رنامه‌ ناوکیه‌که‌ی ئێران به‌ مه‌به‌ستی دروستکردنی چه‌کی ناوکی بێت و هه‌ربۆیه‌شه‌ ژماره‌یه‌ک سزای سه‌پاندۆته‌ سه‌ر ئێران.

هه‌رچی ئێرانیشه‌ جه‌خت ده‌کاته‌وه‌ له‌وه‌ی ئه‌و به‌رنامه‌ ناوکیه‌ی ته‌نها بۆ مه‌به‌ستی ئاشتیانه‌یه‌. ‌
XS
SM
MD
LG