Accessibility links

پـۆلیسی میسر هه‌ڕه‌شه‌ی ته‌قه‌کردن له‌ خۆپـیشـانده‌ران ده‌کات

  • VOA News

ده‌یان هه‌زار میسری لایه‌نگری ئیخوان ئه‌لموسلیمینه‌کان له‌ پاش نوێژی هه‌ینی له‌ چه‌ند ناوچه‌یه‌کی قاهیره‌ی پایته‌خت ڕژانه‌ سه‌ر شه‌قامه‌کان بۆ ده‌ربڕینی ناڕه‌زایی به‌رامبه‌ر حکومه‌تی کاتی که‌ وه‌ک ده‌ڵێن له ئاکامی بڕیاری‌ په‌لاماره‌که‌ی ڕۆژی چوارشه‌ممه‌ی سه‌ر هه‌ردوو ناوچه‌ی ڕابیعه‌ عه‌ده‌ویـیه‌ و نه‌هزه‌ی قاهیره‌ 638 که‌س له‌ لایه‌نگرانیان کوژراون و به‌ هه‌زاران که‌سیشیان برینداربوون.
پـۆلیسی میسر هه‌ڕه‌شه‌ی ته‌قه‌کردنی کردووه‌ بۆ پاراستنی خۆی له‌ خۆپـیشـانده‌رانی دژه‌ ده‌سه‌ڵات، ئه‌وانه‌ی سوورن له‌سه‌ر گه‌ڕانه‌وه‌ی محه‌مه‌د مورسی بۆ سه‌ر پـۆسته‌که‌ی.
هاوکات هێزه‌کانی له‌شـکر و ئاسایش خراونه‌ته‌ حاڵه‌تی ئاماده‌باشیـیه‌وه‌ و له‌ سه‌ر شه‌قامه‌کانی قاهیره‌ی پایته‌خت به‌ ماشێنی زرێپـۆش بڵاوبوونه‌ته‌وه‌. هه‌روه‌ها له‌شـکر شه‌قامی کورنیشی به‌رده‌م ئۆفیسه‌کانی ڕادیۆ و ته‌له‌فیزیۆنی گرتووه‌.
سه‌ره‌ڕای هه‌ڕه‌شه‌کانی حکومه‌تی کاتی، ئیخوان ئه‌لموسلیمینه‌کان سووربوون له‌سه‌ر سـازدانی خۆپـیشـاندانی ناڕه‌زایی گه‌وره‌ له‌ سه‌رانسه‌ری وڵاته‌که‌ و داوایان له‌ لایه‌نگرانی خۆیان کرد‌ له‌ ژێر دروشمی "جمعة الغضب" واته‌ هه‌ینی توڕه‌یی، ئه‌مڕۆ بڕژێنه‌ سه‌ر شه‌قامه‌کان و داوای گه‌ڕانه‌وه‌ی محه‌مه‌د مورسی بکه‌ن.
XS
SM
MD
LG