Accessibility links

زنجیره‌یه‌ک ئۆتۆمبیلی بۆمبڕێژکراو له‌ عێراق ده‌ته‌قنه‌وه‌ و 33 که‌س ده‌کوژرێن

  • VOA News

ژماره‌یه‌ک ئۆتۆمبیلی بۆمبڕێژکراو ڕۆژی پـێـنجشه‌ممه‌ له‌ پایته‌ختی عێراق ته‌قیونه‌ته‌وه‌ و له‌ ئاکامدا 32 که‌س کوژراون و ده‌یان که‌سیش برینداربوون.
پـۆلیس گوتی خوێناوترین ته‌قینه‌وه‌یان له‌ ویزگه‌ی پاسه‌کانی ناوچه‌ی کازمیـیه‌ی زۆرینه‌ شیعه‌ بووه‌ که‌ له‌وێ 8 که‌س کوژراون و 18 ی دیکه‌ برینداربوون.
ئۆتۆمبیلێـکی دیکه‌ له‌ شوێنی گردبوونه‌وه‌ی کرێـکاران له‌ ناوچه‌ی عه‌لاوی نزیک ناوچه‌ی سه‌وز ته‌قیوه‌ته‌وه‌، له‌وێش 6 که‌س کوژراون و 13 که‌سیش برینداربوون.
له‌ ڕۆژهه‌ڵاتی به‌غداش 7 که‌س کوژران و 15 که‌سی دیکه‌ برینداربوون، کاتێـک ئۆتۆمبیلێـک له‌ نزیک ئۆفیسی پـۆلیسی هاتوچۆی ناوچه‌ی به‌له‌دیات ته‌قیـیه‌وه‌. ژماره‌یه‌ک وێنه‌ی ته‌قینه‌وه‌که‌ له‌ لایه‌ن ئاژانسی ده‌نگ‌وباسی ئه‌سۆشیه‌تد پـرێس بڵاوکراونه‌ته‌وه‌ و تیایاندا نیشـان ده‌درێت دوکه‌ڵ له‌ چه‌ند ئۆتۆمبیلێـکی سووتاو به‌رزده‌بێته‌وه‌.
هه‌روه‌ها له‌ ناوچه‌ی باب ئه‌لموعه‌زه‌م ئۆتۆمبیلێـکی بۆمبڕێژکراو لای‌ ڕیزێـک دوکاندا ته‌قیوه‌ته‌وه‌ و بووه‌ته‌ مایه‌ی کوژرانی 4 که‌س و برینداربوونی 12 که‌س. له‌ ڕۆژئاوای به‌غداش بۆمبێـک ته‌قیوه‌ته‌وه‌ که‌ به‌ عه‌ره‌بانه‌یه‌کی فرۆشتنی ئیستوانه‌ی گازدا‌ لکێنرابوو، ئه‌مه‌ش 3 کوژراو و 8 برینداری لێـکه‌وته‌وه‌.
ئۆتۆمبیلێـکی دیکه‌ی بۆمبڕێژکراویش له‌ نزیک شوێنێکی چاکـکردنی ئۆتۆمبیل له‌ گه‌ڕه‌کی حوسنیـیه‌ی باکوری ڕۆژهه‌ڵاتی به‌غدا ته‌قیوه‌ته‌وه‌، 4 که‌س کوژراون و 15 برینداربون.
له‌ ناوچه‌ی سه‌دریش ئۆتۆمبیلێـک له‌ به‌رده‌م ڕیزێـک دوکاندا ته‌قیوه‌ته‌وه‌. پـۆلیس ده‌ڵێت 7 که‌س به‌و ته‌قینه‌وه‌یه‌ برینداربوون.
له‌ باشوری ڕۆژهه‌ڵاتی به‌غداش ئۆتۆمبیلێـکی بۆمبڕێژکراو به‌ هێزێـکی گه‌ڕۆکی پـۆلیسـدا ته‌قیوه‌ته‌وه‌ و به‌هۆیه‌وه‌ که‌سی سیڤیلی ڕێبوار کوژراوه‌ و 4 ی دیکه‌ برینداربوون.
جێی ئاماژه‌یه‌ ئه‌م ته‌قینه‌وانه‌ ڕۆژێـک پاش ئه‌وه‌ ڕوویاندا که‌ سه‌رۆک وه‌زیری عێراق نوری ئه‌لمالیکی به‌ڵێنی دا حکومه‌ته‌که‌ی به‌رده‌وام بـبێت له‌ لێـدان و ده‌سـتگیرکردنی کۆمه‌ڵه‌ یاخیبووه‌کاندا. گوتی هه‌رگیز واز له‌ ڕووبه‌ڕووبوونه‌وه‌ی تێرۆرزم ناهێنین.
په‌یامنێری ده‌نگی ئه‌مه‌ریکا له‌ به‌غدا گۆران تۆفیق ڕاپـۆرتی له‌ باره‌ی ئه‌م ته‌قینه‌وانه‌ ناردووه‌.

XS
SM
MD
LG