Accessibility links

کاثرین ئاشتۆن ده‌ڵێت پـێویسته‌ هه‌موو میسریـیه‌کان له‌ دانانی ئاینده‌ی وڵاته‌که‌یاندا به‌شداری بکه‌ن


کاثرین ئاشتۆن به‌رپـرسی سیاسه‌تی ده‌ره‌وه‌ی یه‌کێتی ئه‌وروپا ده‌ڵێت پـێویسته‌ هه‌موو لایه‌نه‌کان له‌ میسر به‌شـداری بکه‌ن له‌ دانانی ئاینده‌ی وڵاته‌که‌یاندا.
ئاشتۆن ڕۆژی سێشه‌ممه‌ له‌ قاهیره‌ و له‌ کۆنگره‌یه‌کی ڕۆژنامه‌وانی هاوبه‌شدا له‌گه‌ڵ محه‌مه‌د ئه‌لبه‌رادعی جێـگری سه‌رۆکی کاتی میسر ئه‌مه‌ی ڕاگه‌یاند و گوتی پـێویسته‌ هه‌موو جۆره‌ توندوتیژیـیه‌ک بوه‌سـتێت و پاشان پـرۆسه‌یه‌ک بگیرێته‌به‌ر که‌ هه‌موو لایه‌ک له‌خۆبگرێت تاوه‌کو کۆتایی به‌ قه‌یرانه‌که‌ بێت.
گوتیشی شه‌وی دووشه‌ممه‌ چاوی به‌ سه‌رۆکی له‌کار لادراو محه‌مه‌د مورسی که‌وتووه‌ و له‌ باره‌ی هه‌وڵی یه‌کێتی ئه‌وروپا بۆ چاره‌سه‌رکردنی قه‌یرانه‌که‌ قسه‌ی بۆ کردووه‌ و هاوکات گوێبیستی ڕاوبۆچوونه‌کانی ئه‌ویش بووه‌.
ئه‌لبه‌رادعیش لای خۆیه‌وه‌ گه‌شبینی ده‌ربڕی به‌ شیانی کۆتایی‌هێنان به‌و مانگرتنانه‌ی ئیخوان ئه‌لموسلیمینه‌کان سـازی‌ده‌که‌ن له‌ دژی لابردنی محه‌مه‌د مورسی له‌ ده‌سه‌ڵات.
XS
SM
MD
LG