Accessibility links

تورکیا ده‌ست ده‌کات به‌ لێکۆڵینه‌وه‌ له‌ خۆپیشانده‌ران

  • VOA News

جێگری سه‌ره‌ک وه‌زیری تورکیا ده‌ڵێت ده‌سه‌ڵاتداران ده‌ستیان کردووه‌ به‌ لێکۆڵینه‌وه‌ کردن له‌سه‌ر ئه‌و که‌سانه‌ی وه‌ک ده‌گوترێت سوکایه‌تییان به‌ کاربه‌ده‌ستانی ده‌وڵه‌تی تورکیا کردووه‌ و هه‌روه‌هاش ئه‌وانه‌ی هاندانی ئاژاوه‌گێڕییان کردووه‌ له‌ ڕێی تۆڕه‌کانی سۆشیال میدیاوه‌.

ئه‌م ڕاگه‌یاندنانه‌ی به‌کر بۆزداگ ئاماژه‌یه‌ به‌ به‌رنامه‌ی حکومه‌تی تورکیا بۆ سزادانی به‌شداربووان و کارگێڕانی ئه‌و خۆپیشاندانانه‌ی له‌م مانگی شه‌شه‌دا تورکیای گرته‌وه‌.

جێگری سه‌ره‌ک وه‌زیری تورکیا ئه‌مڕۆ پێنجشه‌ممه‌ گوتووشیه‌تی حکومه‌تی وڵاته‌که‌ به‌رنوسێک ده‌خاته‌ به‌رده‌م په‌رله‌مان بۆ کۆت و به‌ندکردنی زیاتری ده‌سه‌ڵاتی له‌شکریی له‌ تورکیادا، وه‌ک ئاژانسی ده‌نگ و باسی ئه‌سیۆشێتد پرێس ده‌ڵێت پێده‌چێت ئه‌م هه‌نگاوه‌ی حکومه‌تی تورکیا جه‌خت کردنه‌وه‌بێت‌ له‌ متمانه‌ بوون به‌ دیموکراسی که‌ ئانکه‌ره‌ ده‌ڵێت خۆپیشانده‌ران ده‌یانویست کاڵی بکه‌نه‌وه‌.

سه‌رچاوه‌کانی هه‌واڵ ئاماژه‌ به‌ داوایه‌کی ئانکه‌ره‌ ده‌که‌ن له‌ تۆڕی سۆشیال میدیای تویته‌ر تا نوێنه‌رایه‌تیه‌کی خۆی له‌ تورکیادا بکاته‌وه‌. وه‌ک ئاژانسه‌کان ده‌ڵێن ئه‌م داوایه‌ی تورکیا به‌مه‌به‌ستی چنگ گیر کردنه‌ له‌ تویته‌ر که‌ ده‌سه‌ڵاتدارانی وڵاته‌که‌ به‌ یارمه‌تیدان بۆ خۆپیشاندانه‌کانی دژه‌ حکومه‌ت گوناهباری ده‌کات.

بینالی یه‌ڵدرم ، وه‌زیری گواستنه‌وه‌ و په‌یوه‌ندیه‌کانی تورکیا به‌ ڕۆژنامه‌وانانی گوتووه‌ به‌بێ هه‌بوونی نوێنه‌رایه‌تی کۆمپانیاکه‌ له‌ تورکیادا ئه‌وا حکومه‌تی تورکیا ناتوانێت به‌ خێرایی بگاته‌ به‌رپرسانی تویته‌ر و فرمانیان بداتێ بۆ سڕینه‌وه‌ی شته‌کان و هه‌روه‌هاش ده‌ستڕاگه‌یشتن به‌ زانیاری له‌سه‌ر ئه‌و که‌سانه‌ی تۆڕی تویته‌ر به‌کار ده‌هێنن.
تۆڕی تویته‌ر هیچ تێبینیه‌کی له‌سه‌ر ئه‌و داوایه‌ی تورکیا نه‌داوه‌ به‌ڵام که‌سێکی نزیک له‌ کۆمپانیاکه‌وه‌ ده‌ڵێت له‌ ئێستادا تویته‌ر هیچ پلانێکی نییه‌ تا ئۆفیسی خۆی له‌ تورکیادا بکاته‌وه‌.

په‌ره‌سه‌ندنی ئه‌و شه‌پۆلی ناڕه‌زاییه‌ی تورکیای گرته‌وه‌ ده‌گه‌ڕێته‌وه‌ بۆ سه‌رکوتکردنێکی قورسی خۆپیشاندانێکی ئاشتیانه‌ی ژینگه‌ پارێزان ‌ له‌لایه‌ن هێزه‌کانی پۆلیسه‌وه‌ له‌ ڕۆژی 31 ی مانگی پێنجدا و دواتریش وه‌رچه‌رخا بۆ گه‌وره‌ترین خۆپیشاندانی دژه‌ حکومه‌ت له‌ماوه‌ی ده‌یان ساڵی ڕابردوودا.

حکومه‌تی تورکیا لۆمه‌ی خۆپیشاندانه‌کان له‌ ئه‌ستۆی ده‌ستی بیانی ده‌نێت و به‌ پیلانگێڕیی بیانیش ناودێری کردووه‌.
XS
SM
MD
LG