Accessibility links

سه‌رۆکی به‌ڕازیل داوای کۆبوونه‌وه‌ی به‌ په‌له‌ی حکومه‌ت ده‌کات له‌ باره‌ی خۆپـیشـاندانه‌کانه‌وه‌


سه‌رۆکی به‌ڕازیل داوای کۆبوونه‌وه‌ی به‌ په‌له‌ی حکومه‌تی کرد به‌ مه‌به‌سـتی وتووێژکردن له‌ باره‌ی ئه‌و خۆپـیشـاندانه‌ ناڕه‌زایـیانه‌ی هه‌تا دێت و توندتر ده‌بن سه‌ره‌ڕای ئه‌و دانه‌واندنانه‌ی حکومه‌ت کردوونی.
به‌ لایه‌نی که‌م ملیۆنێـک خۆپـیشـانده‌ر له‌ ده‌یان شـاری به‌ڕازیل دوێنێ پـێنجشه‌ممه‌ گردبوونه‌وه‌، له‌وانه‌ 300 هه‌زاریان له‌ شـاری ڕیۆ دی جانێرۆ که‌ له‌وێ پـۆلیس گازی فرمێسـک ڕێژ بۆ بڵاوه‌پـێـکردنی خۆپـیشـانده‌ران به‌کارهێنا.
هه‌روه‌ها خۆپـیشـانده‌ران هه‌ڵیانکوتاوه‌ته‌ سه‌ر وه‌زاره‌تی ده‌ره‌وه‌ له‌ به‌ڕازیلیای پایته‌خت و بۆمبی مۆلۆتۆفیان گرتووه‌ته‌ بیناکه‌ به‌ر له‌وه‌ی پـۆلیس پاشه‌کشیان پـێبکات.
سه‌رۆکی به‌ڕازیل خانم دیلیما ڕۆسێف به‌یانی ئه‌مڕۆ هه‌ینی له‌گه‌ڵ ژماره‌یه‌ک له‌ وه‌زیرانی حکومه‌ت کۆده‌بێته‌وه‌ به‌ مه‌به‌ستی وتووێژکردن له‌ باره‌ی چۆنێتی کاردانه‌وه‌ له‌ به‌رامبه‌ر ئه‌م خۆپـیشـاندانانه‌ گه‌ورانه‌ی که‌ بـیست سـاڵه‌ وڵاته‌که‌ له‌و شێوه‌یه‌ی به‌خۆوه‌ نه‌بینیوه‌. خانم دیلیما ڕۆسێف به‌رنامه‌ی سه‌ردانێـکی بۆ ژاپـۆن هه‌ڵوه‌شـانده‌وه‌ که‌ بڕیاربوو هه‌فته‌ی داهاتوو ئه‌نجامی بدات.
جێی ئاماژه‌یه‌ خۆپـیشـاندانه‌کانی ئه‌م هه‌فته‌یه‌ی به‌ڕازیل له‌ ئه‌نجامی زیاکردنی نرخی هاتووچۆ به‌ پاس و شه‌مه‌نده‌فه‌ری ژێر زه‌وی بووه‌، به‌ڵام خۆپـیشـانده‌ران له‌و ده‌مه‌وه‌ سه‌نگیـیان خستووه‌ته‌ سه‌ر ئه‌وه‌ی که‌ ده‌ڵێن حکومه‌ت خزمه‌تگوزاریـیه‌ گشـتیـیه‌کانی پـشـتگوێ خستووه‌ و باجێـکی زۆر وه‌رده‌گرێت و گه‌نده‌ڵی به‌ وڵاته‌که‌دا ته‌شه‌نه‌ی کردووه‌.
XS
SM
MD
LG