Accessibility links

تاڵیبان هێرش ده‌کاته‌ سه‌ر ناوجه‌رگه‌ی پایته‌ختی ئه‌فغانسـتان

  • VOA News

چه‌کدارانی تاڵیبان ئه‌مڕۆ هه‌ینی هێرشیان کردووه‌ سه‌ر ناوجه‌رگه‌ی کابولی پایته‌ختی ئه‌فغانسـتان و که‌وتونه‌ته‌ شه‌ڕه‌ ته‌قه‌ له‌گه‌ڵ هێزه‌کانی ئاسایشـدا.
به‌ لایه‌نی که‌م چوار ته‌قینه‌وه‌ ناوچه‌یه‌کی قه‌ره‌باڵغی شـاره‌که‌ی هه‌ژاند و پاشـان هێزه‌کانی ئاسایش که‌وتنه‌ شه‌ڕێـکی تونده‌وه‌ له‌گه‌ڵ چه‌کداره‌کاندا. کاربه‌ده‌سـتانی ئه‌فغانی ده‌ڵێن 2 له‌ هێرشبه‌ره‌کان کوژراون.
پـۆلیس ده‌ڵێت ته‌قینه‌وه‌ی یه‌که‌م خۆکوژی بووه‌ و له‌ نزیک نه‌خۆشـخانه‌یه‌ک کراوه‌ که‌ له‌ لایه‌ن ده‌زگای زانیاری و ئاسایشی ئه‌فغانی به‌ڕێوه‌ده‌برێت.
تاڵیبان به‌رپـرسیارێتی خۆی له‌ هێرشه‌که‌ ڕاگه‌یاند. ئه‌مه‌ دووه‌م هێرشی گه‌وره‌ی تاڵیبانه‌ بۆ سه‌ر ئه‌و شـاره‌ له‌ ماوه‌ی که‌متر له‌ دوو هه‌فته‌دا.
جێی وه‌بیرهێنانه‌وه‌یه‌ هه‌فته‌ی ڕابردوو هێرشێـکی خۆکوژی له‌ کابول کرا و بووه‌ مایه‌ی کوژرانی 15 که‌س که‌ شه‌شیان سه‌ربازی ئه‌مه‌ریکایی بوون و نۆیان که‌سی سیڤیلی ئه‌فغانی بوون، دووانیان له‌گه‌ڵ سه‌ربازه‌ ئه‌مه‌ریکایـیه‌کاندا کاریان ده‌کرد.
XS
SM
MD
LG