سه‌رۆک وه‌زیری عێراق فه‌رمانی لابردنی ئه‌فسه‌ره‌‌ باڵاکانی له‌شـکر ده‌دات

گوته‌بێژێـکی حکومه‌تی عێراق ده‌ڵێت سه‌رۆک وه‌زیر نوری ئه‌لمالیکی فه‌رمانی داوه‌ فه‌رمانده‌ باڵاکانی له‌شـکر بگۆڕدرێن، ئه‌مه‌ش له‌ پاش ئه‌و هێرشه‌ خۆێناویـیانه‌ی له‌ چه‌ند ڕۆژی ڕابردوودا وڵاته‌که‌یان گرته‌وه‌ و بوونه‌ مایه‌ی کوژرانی ده‌یان که‌س.
عه‌لی موسه‌وی ئه‌مڕۆ چوارشه‌ممه‌ گوتی بڕیاره‌که‌ ڕۆژی سێشه‌ممه‌ ده‌رچووه‌ و فه‌رمانده‌ی فرقه‌ و ئۆپه‌راسیۆنه‌کان ده‌گرێته‌وه‌ له‌ سه‌رانسه‌ری وڵاته‌که‌دا.
جێی ئاماژه‌یه‌ له‌وه‌تای هه‌فته‌ی ڕابردووه‌وه‌ زنجیره‌یه‌ک ته‌قینه‌وه‌ و هێرشی چه‌کداری عێراقی گرته‌وه‌ و به‌هۆیه‌وه‌ به‌ لایه‌نی که‌م 279 که‌س کوژراون و هه‌روه‌ها گرژیـیه‌کانی نێوان سووننه‌کان و حکومه‌تی به‌ ڕابه‌رایه‌تی شیعه‌ی وڵاته‌که‌ زیاکرد.