Accessibility links

ژماره‌یه‌ک له‌ موجاهیدینی خه‌ڵق ده‌گه‌نه‌ ئه‌لبانیا


نه‌ته‌وه‌ یه‌کگرتووه‌کان ده‌ڵێت یه‌که‌م کۆمه‌ڵی ئۆپزسیۆنی ده‌ره‌وه‌ی ئێران له‌ بنکه‌یه‌کی له‌شکری ئه‌مریکا له‌ نزیک به‌غداوه‌ گواستراونه‌ته‌وه‌ بۆ ئه‌لبانیا وه‌ک به‌شێک له‌ پرۆسه‌ی سه‌رله‌نوێ نیشته‌جێکردنیان.

له‌ ڕاگه‌یاندنێکدا ئه‌مڕۆ 5 شه‌ممه‌ مارتن کۆبله‌ر نوێنه‌ری نه‌ته‌وه‌ یه‌کگرتووه‌کان له‌ عێراق ده‌ڵێت 14 ئه‌ندامی موجاهیدینی خه‌ڵق دره‌نگانێکی ڕۆژی چوار شه‌ممه‌ گه‌یشتونه‌ته‌ ئه‌لبانیا وه‌ک به‌شی یه‌که‌می ئه‌و 210 که‌سه‌ی موجاهیدین که‌ حکومه‌تی وڵاته‌که‌ قایل بووه‌ به‌ وه‌رگرتنیان.

نزیکه‌ی 3000 ئه‌ندامی موجاهیدین له‌ ساڵی پاردا له‌ باکوری ڕۆژهه‌ڵاتی عێراقه‌وه‌ گواسترانه‌وه‌ بۆ ئۆردوگایه‌کی په‌نابه‌ران له‌ ده‌ره‌وه‌ی به‌غدا وه‌ک به‌شێک له‌و هه‌وڵه‌ی بۆ دڵنیا بوون له‌ گواستنه‌وه‌یه‌کی پارێزراویان درا.

حکومه‌تی عێراق ده‌خوازێت ڕێکخراوی موجاهیدینی له‌ کۆڵ ببێته‌وه‌ که‌ شان به‌ شانی هێزه‌ سه‌ربازیه‌کانی سه‌دام حسێن شه‌ڕی دژی کۆماری ئیسلامی ئێرانیان ده‌کرد.

موجاهیدینی خه‌ڵق دژی ڕژێمی ئیسلامی ئێرانه‌ و چالاکی جۆراوجۆری له‌شکریی له‌ناو ئێراندا کردووه‌ تا ئه‌وکاته‌ی له‌ ساڵی 2001 دا ئیدانه‌ی کاری توندوتیژی کرد.
XS
SM
MD
LG