Accessibility links

ئه‌مڕۆش ژماره‌یه‌ک ته‌قینه‌وه‌ به‌غدا ده‌هه‌ژێنن

  • VOA News

له‌ به‌غدا ژماره‌یه‌ک ئۆتۆمبێل ده‌ته‌قێندرێنه‌وه‌ و به‌لانی که‌م 12 که‌س ده‌کوژرێن له‌و گه‌ڕه‌کانه‌ی پایته‌ختی وڵاته‌که‌دا که‌ زۆرینه‌ی دانیشتوانه‌که‌ی له‌ شیعه‌ ئاینزاکانن.

ته‌قینه‌وه‌کانی ئه‌مڕۆ پێنجشه‌ممه‌ له‌ گه‌ڕه‌کی شاری سه‌در و ناوچه‌کانی که‌مالییه‌ ڕوویانداوه‌ و به‌لانی که‌م 18 که‌سیشی تیادا بریندار بوون.

ئه‌م ته‌قینه‌وانه‌ی ئه‌مڕۆ دوابه‌داوی زنجیره‌ ته‌قینه‌وه‌کانی ڕۆژی 4شه‌ممه‌ هاتن که‌ له‌وانیشدا گه‌ڕه‌که‌ شیعه‌ نشینه‌کان کرابوونه‌ ئامانج و زیاتر له‌ 30 که‌سیشی تیادا کوژران.
نوری ئه‌لمالیکی سه‌ره‌ک وه‌زیری وڵاته‌که‌ لۆمه‌ی ئه‌و توندوتیژیانه‌ی له‌ ئه‌ستۆی ڕق و کینه‌ی ئاینزایی ناوه‌ و به‌ به‌ره‌نجامێکی ئه‌قڵیه‌تی تایفه‌گه‌رایی ناودێری کردووه‌.

له‌ شاری موسڵیش له‌ باکوری عێراق هێرشبه‌رێکی خۆکوژ به‌ ئۆتۆمبێله‌که‌یه‌وه‌ خۆی له‌ناو بنکه‌یه‌کی پشکنینی له‌شکریدا ته‌قاندۆته‌وه‌ و دوو سه‌ربازی کوشتووه‌ و سیانی تریشی بریندار کردووه‌ .

به‌رده‌وامی توندوتیژیه‌کان له‌ عێراق ترس و نیگه‌رانی به‌دوای خۆیدا هێناوه‌ سه‌باره‌ت به‌ هه‌ڵایسانه‌وه‌ی شه‌ڕی تایفه‌یی له‌ وڵاته‌که‌دا هاوشێوه‌ی شه‌ڕه‌کانی ساڵانی 2006 و 2007 که‌ ده‌یان هه‌زار که‌سی تیادا کوژران.
له‌ ڕاپۆرتێکی نه‌ته‌وه‌ یه‌کگرتووه‌کاندا مانگی چواری ڕابردوو به‌ خوێناوی ترین مانگی عێراقیه‌کان دانراوه‌ له‌وتای مانگی 6ی ساڵی 2008 ه‌وه‌ که‌ 712 که‌س ته‌نها له‌ مانگی چواردا کوژراون و 1633 که‌سیش بریندار بوون.
له‌ باره‌ی ئه‌م هێرشانه‌وه‌ گۆران تۆفیق په‌یامنێری ده‌نگی ئه‌مه‌ریکا له‌ به‌غدا ڕاپـۆرتی ناردووه‌.

XS
SM
MD
LG