Accessibility links

دوو پـۆلیس له‌ به‌رده‌م ئۆفیسی سه‌رۆک وه‌زیری ئیتالیا بریندارده‌کرێن


له‌و ده‌مه‌ی ئه‌ندامانی حکومه‌تی نوێی ئیتالیا به‌ سه‌رۆکایه‌تی ئینریکۆ لیتا ئه‌مڕۆ یه‌کشه‌ممه‌ له‌ کۆشـکی سه‌رۆکایه‌تی سوێندی فه‌رمیـیان ده‌خوارد، له‌ دوری نزیکه‌ی کیلۆمه‌ترێـک له‌ لای ئۆفیسی سه‌رۆک وه‌زیر که‌سێـک ته‌قه‌ی له‌ دوو پـۆلیس کرد و برینداریکردن.
گه‌واهیده‌ران ده‌ڵێن هێرشبه‌ره‌که‌ له‌ پـۆلیسه‌کان نزیک ‌که‌وتووه‌ته‌وه‌ ده‌مانچه‌ی ده‌رهێناوه‌‌ و هاواری کردووه‌ "ته‌قه‌م لێبکه‌ن" و پاشـان هه‌شت گولـله‌ی ته‌قاندووه‌ و ئه‌و دوو پـۆلیسه‌ برینداربوون.
ده‌شڵێن هێرشبه‌ره‌که‌ به‌ برینداری ده‌سـتگیرکراوه‌، هه‌روه‌ها یه‌ک له‌ پـۆلیسه‌کان گولـله‌ به‌ر ملی که‌وتووه‌ و ئه‌وی دیکه‌یان به‌ر لاقی.
ئنجلینۆ ئه‌لفانۆ وه‌زیری ناوخۆی ئیتالیا ده‌ڵێت هێرشه‌که‌ کارێـکی تاکه‌ که‌سیـیه‌ و هیچ مه‌ترسیـیه‌ک بۆ سه‌ر باری ئاسایش نیـیه‌.
پـۆلیس ده‌ڵێت گومانباره‌که‌ ناوی (لویجی پـرێـتی)‌یه‌، ته‌مه‌نی له‌ چله‌کاندایه‌، خه‌ڵـکی باشوری وڵاته‌که‌یه‌ و باری ده‌روونی ته‌واو نه‌بووه‌ به‌هۆی له‌ده‌سـتدانی کاره‌که‌ی و جیابوونه‌وه‌ی له‌ هاوسه‌ره‌که‌ی.
XS
SM
MD
LG