Accessibility links

گومانباری دووه‌می هه‌ردوو ته‌قینه‌وه‌که‌ی بۆستن ده‌سـتگیرده‌کرێت


پاش ئه‌وه‌ی ئێواره‌ی هه‌ینی ئاشـکرابوو گومانباری دووه‌م خۆی له‌ به‌له‌مێـکدا حه‌شارداوه‌ که‌ له‌ پـشتی ماڵێـکدایه‌ له‌ شه‌قامی فرانکلینی ناوچه‌ی واته‌رتاونی ڕۆژئاوای شـاری بۆستن له‌ سـتانی ماساچوستس، هێزه‌کانی پـۆلیس و ئاسایش چوارده‌وری ناوچه‌که‌یان دا.
دواتر گومانبار Dzhokar Tsarnaev ته‌مه‌ن 19 سـاڵ خۆی به‌ده‌سـته‌وه‌ دا و ئێسـتا به‌ره‌و نه‌خۆشـخانه‌ براوه‌ بۆ چاره‌سه‌رکردنی ئه‌و برینانه‌ی وه‌ک ده‌ڵێن له‌ شه‌ڕه‌ ته‌قه‌ی زوویه‌کی هه‌ینیدا برینداربوو.
کاربه‌ده‌سـتان ده‌ڵێن برینه‌که‌ی سه‌خته‌ و خوێنێـکی زۆری لێ ڕۆیشتووه‌.
به‌پـێی یاساکان گومانباره‌که‌ به‌ تاوانی ئه‌نجامدانی کاری تێرۆریستی ڕاده‌سـتی ده‌زگای لێـکۆڵینه‌وه‌ی فیدراڵی FBI ده‌کرێت.
دوای ڕاگه‌یاندنی هه‌واڵی ده‌سـتگیرکردنه‌که‌، ژماره‌یه‌گی زۆری دانیشـتوانی واته‌رتاون و بۆستن ڕژانه‌ سه‌ر شه‌قامه‌کان بۆ ده‌ربڕینی خۆشـحاڵی خۆیان و ده‌سـتخۆشی له‌ هێزه‌کانی پـۆلیس و ئاسایش.
جێی ئاماژه‌یه‌ Dzhokar Tsarnaev و برا گه‌وره‌که‌ی Tamerlan Tsarnaev که‌ زوویه‌کی هه‌ینی کوژرا، له‌ ته‌مه‌نی منداڵیـیه‌وه‌ له‌ هه‌رێمی چیچانی ڕووسیاوه‌ بۆ ئه‌مه‌ریکا هاتوون. ژماره‌یه‌ک له‌ خزمان و هاوڕێـیانیان سه‌رسام بوون و ده‌ڵێن ناتوانن بڕوا بکه‌ن ئه‌م دوو برایه‌ ئه‌و تاوانه‌ قێزه‌وه‌نه‌یان ئه‌نجام دابێت.
XS
SM
MD
LG