Accessibility links

ڕێوڕه‌سمی به‌خاکسـپاردنی مارگرێت تاتچه‌ر له‌ له‌نده‌ن به‌ڕێوه‌ده‌چێت

  • VOA News

هه‌زاران که‌س ئه‌مڕۆ چوارشه‌ممه‌ له‌ ناوه‌ندی له‌نده‌ن له‌سه‌ر شه‌قامه‌کاندا وه‌سـتابوون بۆ بینینی که‌ژاوه‌ی ته‌رمی مارگرێت تاتچه‌ر سه‌رۆک وه‌زیری پـێشـووی به‌ریتانیا.
کفنی تاتچه‌ر که‌‌ ئاڵای وڵاته‌که‌ی به‌سه‌ر درابوو، له‌ وێستمنه‌سته‌ره‌وه‌ بۆ کڵێسـای سـانت پـوڵ گواسترایه‌وه‌ که‌ له‌وێ ڕابه‌ر و که‌سایه‌تیـیه‌کانی جیهان‌ له‌ 170 وڵات له‌ چاوه‌ڕێـیدا بوون.
ئێلیزابێتی شاژنی به‌ریتانیا و شـازاده‌ فیلیپ له‌ نێو ئه‌و 2300 که‌سه‌دا بوون که‌ له‌ کڵێسـاکه‌دا گردبووبوونه‌وه‌ بۆ به‌شـداریکردن له‌ پـرسه‌که‌دا.
ڕیچارد چارته‌ر گه‌وره‌ قه‌شه‌ی له‌نده‌ن له‌ ڕێوڕه‌سمه‌که‌دا زیاتر باسی له‌ که‌سایه‌تی ئه‌م ڕێبه‌ره‌ کۆچکردووه‌ی وڵاته‌که‌ی کرد وه‌ک له‌وه‌ی باس له‌ ڕابردووه‌ سیاسیـیه‌که‌ی بکات، بۆیه‌ وه‌ک هاوسه‌ر و دایک و دایه‌گه‌وره‌ باسی له‌ ژیانی ئه‌م خانمه‌ی که‌ به‌ " ژنی ئاسنی" له‌ جیهانی سیاسیدا ناسرابوو.
زیاتر له‌ 4 هه‌زار پـۆلیس له‌ له‌نده‌ن بڵاوکرانه‌وه‌ وه‌ک به‌شێـک له‌و ڕێوشوێنه‌ تونده‌ ئاسایشیـیه‌ پـترانه‌ی گیرانه‌به‌ر له‌ پاش هێرشه‌که‌ی ڕۆژی دووشه‌ممه‌ی بۆستن.
جێی ئاماژه‌یه‌ مارگرێت تاتچه‌ر 9 ڕۆژ له‌مه‌وبه‌ر و له‌ ته‌مه‌نی 87 سـاڵیدا به‌ جه‌ڵته‌ی مێشـک گیانی له‌ده‌سـتدا. یه‌که‌م و تاکه‌ ژنه‌ هه‌تا ئێسـتا پـۆستی سه‌رۆک وه‌زیری به‌ریتانیای گرتبێته‌ده‌ست. هه‌روه‌ها یه‌کێـک بوو له‌ ڕێبه‌ره‌ به‌تواناکانی جیهان کاتێـک سه‌رۆک وه‌زیر بوو له‌ نێوان سـاڵانی 1979 هه‌تا 1990 .
XS
SM
MD
LG