Accessibility links

داوایه‌کی یاسایی له‌سه‌ر باسم یوسف ڕه‌ت ده‌کرێته‌وه‌


 باسم یوسف

باسم یوسف

دادگایه‌ک له‌ قاهیره‌ داوایه‌کی یاسایی ڕه‌تکرده‌وه‌ که‌ له‌لایه‌ن پارێزه‌رێکی ئیخوانولموسلمینه‌کانی میسره‌وه‌ تۆمارکرابوو وه‌ تیایدا داوای ڕاگرتنی به‌رنامه‌یه‌کی ناوداری ساتیره‌یی ته‌له‌فزیۆنی کردبوو به‌هۆی وه‌ک ده‌ڵێت سوکایه‌تی به‌ سه‌رۆکی میسر کردووه‌ و هه‌روه‌هاش به‌دکاریی سێکسی له‌و به‌رنامه‌یدا ئاماژه‌ی پێکراوه‌.

دادوه‌ر حه‌سونه‌ ته‌وفیق ده‌ڵێت بۆیه‌ ئه‌و داوا یاساییه‌ی له‌سه‌ر به‌رنامه‌ی ئه‌لبه‌رنامج ی باسم یوسف تۆمار کرابوو ڕه‌تکرایه‌وه‌ چونکه‌ دادپارێز بڕوای به‌ دۆسێکه‌ نه‌بووه‌ و گوتوشیه‌تی به‌ڵگه‌ی گونجاویش له‌ ئارادا نه‌بوون بۆ دادگاییکردنی.

باسم یوسف که‌ به‌ جان ستیوارت ی وڵاتی میسر ناسراوه‌ زۆرجار له‌ به‌رنامه‌ ساتیره‌ییه‌که‌یدا باسی له‌ موحه‌مه‌د مورسی سه‌رۆکی میسر کردووه‌.

عه‌بدولمونعم مه‌قسود ، سه‌رۆکی پارێزه‌رانی ڕێکخراوی ئیخوانولموسلیمینه‌کانی میسر به‌ ئاژانسی ده‌نگ و باسی ئه‌سیۆشێتد پرێسی گوتووه‌ ئه‌و بڕیاره‌ له‌جێی خۆیدا نه‌بووه‌ بۆ ڕه‌تکردنه‌وه‌ی داوا یاساییه‌که‌.

تا ئێستا چه‌ندان جار داوای یاسایی له‌لایه‌ن پارێزه‌ره‌کانی ئیخوانه‌کانه‌وه‌ دژی باسم یوسف و که‌سایه‌تیه‌ ناسراوه‌کانی تری میسر تۆمارکراون به‌هۆی ئه‌و بڕوا سیاسی و ئاینیانه‌ی هه‌یانبووه‌.

ڕێکخراوه‌کانی ئۆپزسیۆن و چالاکوانانیش ده‌ڵێن ئه‌و جۆره‌ داوا یاساییانه‌ی تۆمار ده‌کرێن له‌ دادگاکان یانیش له‌ ئۆفیسه‌کانی دادپارێزاندا به‌شێکن له‌ هه‌ڵمه‌تێکی به‌رفراونتر بۆ سه‌رکوتکردنی ئازادیه‌کانی ڕاگه‌یاندن و ڕاده‌ربڕین.
XS
SM
MD
LG