Accessibility links

مه‌عاز ئه‌لخه‌تیب ده‌ست له‌کارکێشـانه‌وه‌ی خۆی له‌ سه‌رۆکایه‌تی هاوبه‌ندی ئۆپـۆزسیۆنی سوریا ڕاده‌گه‌یه‌نێت

  • VOA News

مه‌عاز ئه‌لخه‌تیب

مه‌عاز ئه‌لخه‌تیب

سه‌رۆکی هاوبه‌ندی نیشـتمانی ئۆپـۆزسیۆنی سوریا مه‌عاز ئه‌لخه‌تیب ده‌سـت له‌کارکێشـانه‌وه‌ی خۆی له‌ پـۆسته‌که‌ی ڕاگه‌یاند به‌هۆی وه‌ک ده‌ڵێت مه‌سه‌له‌کان گه‌یشتنه‌ هێڵی سوور.
ئه‌لخه‌تیب ئه‌مڕۆ یه‌کشه‌ممه‌ له‌ ڕاگه‌یاندنێـکدا له‌سه‌ر فه‌یسبوکه‌که‌ی خۆی ده‌ڵێت دوو سـاڵه‌ گه‌لی سوریا به‌ به‌رچاوی جیهانه‌وه‌ له‌ لایه‌ن ڕژێمێـکی دڕنده‌ی بێ پـێشینه‌ لێی ده‌کوژرێت.
ده‌شڵێت زۆرن ئه‌وانه‌ی ده‌سـتی یارمه‌تی مرۆیی‌یان بۆ درێژکردوون و سوپاسیان ده‌که‌ن، به‌ڵام به‌ گوته‌ی خۆی ڕاستیـیه‌کی تاڵیش هه‌یه‌، ئه‌وه‌یه‌ ده‌یانه‌وێت گه‌لی سوریا ده‌سته‌مۆبکه‌ن و گه‌مارۆی شۆڕشه‌که‌ی و هه‌وڵی کۆنترۆڵکردنی بده‌ن.
پاشـان ڕه‌خنه‌ له‌ کۆمه‌ڵی نێوده‌وڵه‌تی ده‌گرێت و ده‌ڵێت هه‌موو ئه‌و ماڵ‌وێرانیـیه‌ی به‌سه‌ر گه‌لی سوریادا هاتووه‌ و ئه‌و ده‌یان هه‌زار که‌سه‌ی لێ ده‌سـتگیرکراون و به‌ سه‌دان هه‌زاره‌شی ئاواره‌بوون، به‌س نیـیه‌ بۆ ئه‌وه‌ی بڕیارێـکی نێوده‌وڵه‌تی بدرێت بۆ ڕێگه‌دان به‌ گه‌لی سوریا به‌رگری له‌خۆی بکات؟.
ده‌شڵێت هه‌ر که‌سێـک گوێ‌ڕایه‌ڵیان ببێت پـشـتگیری ده‌که‌ن، وه‌ ئه‌گه‌ر نا ئه‌وا دووچاری بـرسێتی و گه‌مارۆدانی ده‌که‌ن.
پاشـان ڕه‌خنه‌ له‌ حکومه‌تی ئه‌سه‌د ده‌گرێت و ده‌ڵێت ڕژێم به‌ سه‌رکێشیـیه‌که‌ی هه‌لی زۆری بۆ ئاشـته‌وایی نیشـتمانی فه‌وتان‌.
دواتر ئه‌لخه‌تیب له‌ ڕاگه‌یاندنه‌که‌یدا ده‌ڵێت وه‌ک به‌ڵێنی دابوو ده‌ست له‌کاره‌که‌ی ده‌کێشێته‌وه‌ ئه‌گه‌ر هاتوو مه‌سه‌له‌کان گه‌یشتنه‌ هێڵی سوور، بۆیه‌ وا ئه‌مڕۆ به‌ڵێنه‌که‌ی خۆی ده‌هێنێته‌ دی و ده‌ست له‌کارکێشـانه‌وه‌ی خۆی ڕاده‌گه‌یه‌نێت تاوه‌کو بتوانێت به‌ ئازادانه‌ کاربکات له‌ ده‌ره‌وه‌ی داموده‌زگا فه‌رمیـیه‌کاندا که‌ ئه‌و ئازادیه‌یان تیادا نیـیه‌. گوتیشی به‌رده‌وام ده‌بێت له‌گه‌ڵ براکانیدا، ئه‌وانه‌ی ئازادیـیان بۆ گه‌لی سوریا ده‌وێت. داواشی له‌ گه‌لی سوریا کرد دان‌به‌خۆیاندابگرن و خۆڕاگربن.
XS
SM
MD
LG