Accessibility links

کۆنگره‌ی ڕۆژنامه‌وانی هاوبه‌شی وه‌زیری به‌رگری ئه‌مه‌ریکا و کارزایی هه‌ڵده‌وه‌شێته‌وه‌


کاربه‌ده‌سـتانی ئه‌مه‌ریکایی ده‌ڵێن به‌هۆی مه‌ترسی ئاسایشیـیه‌وه‌ کۆنگره‌یه‌کی ڕۆژنامه‌وانی هاوبه‌ش هه‌ڵوه‌شێنرایه‌وه‌ که‌ بڕیاربوو ئه‌مڕۆ یه‌کشه‌ممه‌ له‌ کابولی پایته‌ختی ئه‌فغانسـتان بۆ چه‌ک هه‌گڵ وه‌زیری به‌رگری ئه‌مه‌ریکا و حامید کارزایی سه‌رۆک ئه‌فغانسـتان سـازبکرێت.
ده‌سه‌ڵاتداران ڕوونیان نه‌کرده‌وه‌ مه‌ترسیـیه‌ ئاسایشـیـیه‌که‌ چیـیه‌، به‌ڵام ڕۆژێـک له‌مه‌وبه‌ر دوو ته‌قینه‌وه‌ی خۆکوژی ڕوویاندا، یه‌کێـکیان له‌ کابول و ئه‌وی دیکه‌یان له‌ خۆست. ته‌قینه‌وه‌که‌ی کابول له‌ به‌رده‌م وه‌زاره‌تی به‌رگری ئه‌فغانیدا بوو، له‌و ده‌مه‌ی چه‌ک هه‌گڵ سه‌ردانی شـاره‌که‌ی ده‌کرد و بووه‌ مایه‌ی کوژرانی 19 که‌س.
هه‌ڵوه‌شـاندنه‌وه‌ی کۆنگره‌ ڕۆژنامه‌وانیـیه‌که‌ دوایـین ڕووداو بوو بـبێت له‌ میانه‌ی ئه‌م یه‌که‌م سه‌ردانه‌ی چه‌ک هه‌گڵ وه‌ک وه‌زیری به‌رگری ئه‌مه‌ریکا بۆ ئه‌فغانسـتان.
پـێشتر ئه‌مڕۆ، سه‌رۆک کارزایی تاڵیبانی تاوانبارکرد به‌وه‌ی خزمه‌تی ئه‌مه‌ریکا ده‌کات به‌ هێرشه‌کانی له‌ جۆری ئه‌وانه‌ی ڕۆژی شه‌ممه‌ ئه‌نجامی داون. ده‌ڵێت ئه‌فغانیـیه‌کان به‌وانه‌ ده‌ترسن و وه‌هایان لێـده‌کات پـێویستیان به‌ مانه‌وه‌ی هێزه‌ بیانیـیه‌کان ببێت له‌ پاش واده‌ی کشـانه‌وه‌ی هێزه‌کان له‌ سـاڵی 2014.
جه‌نه‌ڕاڵ جۆزێڤ ده‌نفۆرد گه‌روه‌ ئه‌فسه‌ری ئه‌مه‌ریکایی له‌ ئه‌فغانسـتان لای خۆیه‌وه‌ به‌ توندی ڕه‌خنه‌ی له‌و لێـدوانه‌ی کارزایی گرت و گوتی" له‌ ماوه‌ی 12 سـاڵی ڕابردوودا به‌ توندی شه‌ڕمان کردووه‌ و خوێنێـکی زۆریشـمان ڕشتووه‌ و هه‌رگیز بیرمان نه‌کردووه‌ته‌وه‌ که‌ توندوتیژی و نائارامی له‌ به‌رژه‌وه‌ندی ئێمه‌دا بێت."
XS
SM
MD
LG