Accessibility links

ڕۆژنامه‌ی نیویۆرک تایمز ده‌ڵێت هاکه‌رانی چین هێرشیان کردووه‌ته‌ سه‌ر ماڵپه‌ڕه‌که‌یان


ڕۆژنامه‌ی نیویۆرک تایمزی ئه‌مه‌ریکایی ده‌ڵێت هێرشبه‌رانی ئنته‌رنێتی چینی به‌رده‌وام هێرشیان کردووه‌ته‌ سه‌ر ماڵپه‌ڕ و ڕۆژنامه‌وانه‌کانیان، له‌و ده‌مه‌ی نیویۆرک تایمز په‌کینی توڕه‌کرد به‌ بڵاوکردنه‌وه‌ی وتارێـک که‌ تیایدا سامان و دارایی سیاسه‌تمه‌دارێـکی پایه‌به‌رزی چینی ئاشکراکرد.
ئه‌مڕۆ پـێنجشه‌ممه‌ له‌ ڕاپـۆرتێـکیدا ڕۆژنامه‌ی نیویۆرک تایمز ئاماژه‌ به‌وه‌ کرد هێرشبه‌رانی چینی سه‌ر ئنته‌رنێت، ئه‌وانه‌ی به‌ هاکه‌ر ده‌ناسرێن، ئه‌و تاکتیکه‌یان به‌کارهێناوه‌ که‌ له‌ لایه‌ن له‌شـکری چینه‌وه‌ به‌کارده‌هێنرێت بۆ دۆزینه‌وه‌ی پاسۆرد و دزه‌کردنه‌ نێو ماڵپه‌ڕی ڕۆژنامه‌که‌یانه‌وه‌.
ڕۆژنامه‌که‌ ده‌شڵێت هاکه‌ره‌کان پاسۆردی ژماره‌یه‌ک له‌ په‌یامنێرانی پایه‌به‌رز و کارمه‌ندانی دیکه‌ی ڕۆژنامه‌که‌یان دزیوه‌.
ڕۆژنامه‌ی ئاماژه‌پـێدراو ده‌شڵێت هێرشکردنه‌ سه‌ر ماڵپه‌ڕه‌که‌یان له‌ لایه‌ن چینه‌وه‌‌ ده‌سـتیـپـێکرد هاوکات له‌گه‌ڵ بڵاوکردنه‌وه‌ی ئه‌و ڕاپـۆرته‌ی مانگی ده‌ی سـاڵی ڕابردوو، ئه‌وه‌ی تیایدا باس له‌ ورده‌کاریـیه‌کانی بڕی 2.7 ملیار دۆلار کرا که‌ له‌ لایه‌ن خانه‌وادای وین زیباو سه‌رۆک وه‌زیری پـێشووی چینه‌وه‌ به‌ده‌سـتهێنرابوو.
حکومه‌تی چینیش به‌ توڕه‌یی کاردانه‌وه‌ی له‌ به‌رامبه‌ر بڵاوکردنه‌وه‌ی ئه‌م ڕاپـۆرته‌ نیشـان دا و گوتی ئه‌م هه‌واڵه‌ ناوبانگی ڕابه‌رێـک ده‌زڕێنێت که‌ به‌ ده‌ستپاکی ده‌ناسرێت.
هاوکات چین ده‌ستبه‌جێ ماڵپه‌ڕی ڕۆژنامه‌ی نیویۆرک تایمزی به‌ هه‌ردوو زمانی ئینگلیزی و چینی به‌ربه‌ستکرد و هه‌ڕه‌شه‌ی ده‌رئه‌نجامی خراپـیشی کرد.
XS
SM
MD
LG