Accessibility links

سه‌رچاوه‌ سیاسیـیه‌کان: به‌ره‌ی دژ به‌ مالیکی فراونتر ده‌بێت

  • Goran Tawfeeq

سه‌رچاوه‌ سیاسیـیه‌کان باس له‌وه‌ ده‌که‌ن که‌ به‌ره‌ی دژ به‌ مالیکی به‌رفراوانی به‌خۆیه‌وه‌ بینیوه‌ و هاوپه‌یمانی نیشـتیمانی شیعه‌کانیش له‌ چه‌ندین ئاماژه‌دا ئه‌و لێـکترازانه‌ی پـێـکهاته‌ی شیعه‌کان دووپات ده‌که‌نه‌وه‌.
له‌ دوایـین ڕاگه‌یاندنی ئه‌نجومه‌نی باڵای ئیسلامی و سه‌دریـیه‌کانیشـدا به‌ ڕوونی باسی لێوه‌کراوه‌ که‌ نوری ئه‌لمالیکی سه‌رۆک وه‌زیر له‌ په‌یڕه‌وی هاوپه‌یمانێتی و پابه‌ندنه‌بوونی به‌ سیاسه‌ته‌که‌ی لایداوه‌.
شوان ته‌ها ئه‌ندامی هاوپه‌یمانی کوردسـتانی له‌ په‌رله‌مانی عێراق ده‌ڵێت ده‌وڵه‌تی یاسای سه‌رۆک وه‌زیر نوری ئه‌لمالیکی کێشه‌ی له‌گه‌ڵ لیستی عێراقیـیه‌ و هه‌رێمی کوردسـتان هه‌یه‌ و ته‌نانه‌ت له‌ ناو هاوپه‌یمانی نیشـتیمانیشدا کێشه‌ی له‌گه‌ڵ هه‌ندێـک له‌ قه‌واره‌ سیاسیـیه‌کاندا هه‌یه‌.
ده‌شڵێت هه‌روه‌ها ده‌وڵه‌تی یاسا نه‌یتوانی به‌ شێوه‌یه‌کی ته‌ندروست ئیداره‌ی حکومه‌ت بکات، بۆیه‌ هه‌وڵ ده‌دات کێشه‌ و قه‌یران له‌ شوێنێـک بۆ شوێنێـکی دیکه‌ و یان له‌ کاتێـک بۆ کاتێـکی دیکه‌ بگوێزێته‌وه‌.
XS
SM
MD
LG