Accessibility links

چوار که‌س به‌ تاوانی هه‌وڵی تێرۆرستی له‌ کالیفۆرنیا ده‌سـتگیرده‌کرێن

  • VOA News

کاربه‌ده‌سـتانی ئه‌مه‌ریکا 4 که‌سیان له‌ ویلایه‌تی کالیفۆرنیا ده‌سـتگیرکردووه‌ به‌ تاوانی هه‌وڵی کوشـتنی که‌سانی ئه‌مه‌ریکایی له‌ ده‌ره‌وه‌ی وڵات و هه‌روه‌ها په‌یوه‌ندیکردن به‌ قاعیده‌ و تاڵیبانه‌وه‌.
ده‌زگای لێـکۆڵینه‌وه‌ی فیدراڵی ئه‌مه‌ریکا FBI شه‌وی دووشه‌ممه‌ ڕایگه‌یاند که‌وا ئه‌م کۆمه‌ڵه نیازان هه‌بووه‌ ته‌قینه‌وه‌ له‌ بنکه‌ی له‌شـکری و ده‌زگاکانی حکومه‌تدا ئه‌نجام بده‌ن.
یه‌ک له‌ تاوانباره‌کان ناوی سوهێل عومه‌ر که‌بیره‌ و ته‌مه‌نی 34 سـاڵه‌ و ئه‌مه‌ریکایـیه‌کی به‌ ڕه‌چه‌ڵه‌ک ئه‌فغانیـیه‌ و له هه‌ردوو سـاڵی‌ 2000 و 2001 خزمه‌تی سه‌ربازی کردووه‌. ده‌ڵێن ئه‌م که‌سه‌ له‌ 2010 دا دووانی له‌ تاقمه‌که‌ی به‌ مه‌لای توندڕه‌وی سه‌ر به‌ ئه‌لقاعیده‌ ئه‌نوه‌ر ئه‌لعه‌وله‌قی ناساندووه‌، ئه‌وه‌ی به‌ هێرشێـکی فڕۆکه‌ی بێ فڕۆکه‌وان له‌ یه‌مه‌ندا کوژرا.
هه‌روه‌ها ده‌ڵێن سوهێل بۆ ئه‌فغانسـتان چووه‌ به‌ مه‌به‌ستی کۆبوونه‌وه‌ له‌گه‌ڵ که‌سانی سه‌ر به‌ ئه‌لقاعیده‌دا.
ئه‌و سێ که‌سه‌ی له‌گه‌ڵ سوهێلدا بوون یه‌کێـکیان ئه‌مه‌ریکایـیه‌ و دووانیان دانیشـتووی ئه‌مه‌ریکان که‌ به‌ ڕه‌چه‌ڵه‌ک مه‌کسیکی و فلپـینین. به‌پـێی یاسای ئه‌مه‌ریکا سزای ئه‌و تاوانانه‌ی ئاڕاسته‌یان کراوه‌، ده‌گاته‌ 15 سـاڵ زیندانی.
XS
SM
MD
LG