Accessibility links

به‌ریتانیا ده‌یه‌وێت دڵنیا بێت له‌وه‌ی کورد شوێنی له‌ حکومه‌تی داهاتووی سوریادا ده‌بێت


ولیه‌م هه‌یگ وه‌زیری ده‌ره‌وه‌ی به‌ریتانیا له‌ لێـدوانێـکیدا بۆ ڕادیۆی BBC گوتی وڵاته‌که‌ی پـێـکهێنانی هاوبه‌ندی ئۆپـۆزسیۆنی سوریا به‌ هه‌نگاوێـکی گه‌وره‌ به‌ره‌و پـێشه‌وه‌ داده‌نێت، به‌ڵام له‌ هه‌مان کاتیشـدا ده‌یه‌وێت بزانێت به‌رنامه‌ و پـلانه‌کانی چین و هه‌روه‌ها چۆن و کێن ئه‌وانه‌ی به‌ نیازن دایانبمه‌زرێنن و ئایا کورد تیایدا به‌شـدار ده‌بێت یان نا و هه‌تا چه‌ند ئه‌م هاوبه‌ندیـیه‌ له‌ ناو سوریادا پشـتیوانی لێـده‌کرێت.
هه‌یـگ گوتیشی وڵاته‌که‌ی زۆر گرنگی به‌ مه‌سه‌له‌ی سوریا ده‌دات و هه‌ر بۆیه‌ ڕۆژی پـێـنجشه‌ممه‌ ئه‌نجومه‌نی ئاسایشی نه‌ته‌وه‌یی به‌ریتانیا کۆبووه‌وه‌ به‌ مه‌به‌سـتی وتووێژ له‌ باره‌ی پـێشـکه‌شکردنی کۆمه‌کی له‌شـکری بۆ ئۆپـۆزسیۆنی سوریا، به‌ڵام هێشـتا به‌ریتانیا هه‌ڵوێستی خۆی نه‌گۆڕیوه‌ و هه‌ر ته‌نها کۆمه‌کی ناکوشنده‌یان ده‌کات.
پاش ئه‌م لێـدوانانه‌، هه‌یگ له‌گه‌ڵ شـاند‌ی هاوبه‌ندی ئۆپـۆزسیۆنی سوریا کۆبووه‌وه‌ که‌ پـێـکهاتبوو له‌ مه‌عاز ئه‌لخه‌تیب سه‌رۆکی هاوبه‌ندیـیه‌که‌ و هه‌ردوو جێـگره‌که‌ی ڕیاز سه‌یف و سوهێر ئه‌تاسی.
هه‌یگ پـێی ڕاگه‌یاندوون که‌ به‌ریتانیا تاووتوێی مه‌سه‌له‌ی دانپـیادانان به‌ هاوبه‌ندیـیه‌که‌یاندا ده‌کات وه‌ک تاکه‌ نوێنه‌ری گه‌لی سوریا، به‌ڵام ده‌یه‌وێت پـێش ئه‌وه‌ی ئه‌و هه‌نگاوه‌ بنێت زیاتر له‌ باره‌ی پـلانه‌کانیانه‌وه‌ بزانێت.
XS
SM
MD
LG