Accessibility links

زیندانیانی ژن له‌ ئێران مانده‌گرن


به‌لانی که‌م نۆ خانمی زیندانی سیاسی له‌ کۆماری ئیسلامی ئێران ده‌ستیان کردووه‌ به‌ مانگرتن له‌ خواردن وه‌ک ناڕه‌زایی ده‌ربڕین له‌سه‌ر ئه‌و پێشێلکاریانه‌ی به‌رامبه‌ر به‌ گیراوه‌کان ده‌کرێن له‌ زیندانه‌ سه‌ره‌کیه‌که‌ی تاراندا.

ماڵپه‌ڕی که‌لیمه‌ وه‌ک ئاژانسی ده‌نگ و باسی ئه‌سیۆشێتد پرێس ئاماژه‌ی پێکردووه‌ ده‌ستپێکردنی مانگرتنه‌که‌ ده‌گه‌ڕێته‌وه‌ بۆ پاش ئه‌وه‌ی پاسه‌وانێکی ئافره‌ت له‌ گرتوخانه‌ی ئه‌ڤین له‌ باکوری تاران ده‌ستیکردووه‌ به‌ پشکنینێکی بێ مۆڵه‌ت که‌ پشکنینی جه‌سته‌شی گرتۆته‌وه‌ و هه‌روه‌هاش وه‌ک له‌ ڕاپۆرته‌که‌ی که‌لیمه‌دا ئاماژه‌ی پێکراوه‌ لێدان و سوکایه‌تی پێکردنیش به‌ خانمانی گیراو کراوه‌.

به‌ گشتی ئه‌و گیراوانه چالاکوانی سیاسی و ڕۆژنامه‌وانانن و له‌پاش ناڕه‌زاییه‌کانی ساڵی 2009 ده‌ستگیرکراون واته‌ له‌ پاش سه‌رله‌ نوێ هه‌ڵبژاردنه‌وه‌ مشت و مڕ له‌سه‌ره‌که‌ی مه‌حمودی ئه‌حمه‌دی نه‌ژاد سه‌رۆکی ئێران.

ماڵپه‌ڕی که‌لیمه‌ که‌ ئۆپزسیۆنی سه‌وز له‌ ئێران به‌ڕێوه‌ی ده‌بات ده‌ڵێت زیندانیه‌ مانگرتووه‌کان داوا ده‌که‌ن داوای لێبوردنیان لێبکرێت و جارێکی دیش کارمه‌ندانی گرتوخانه‌که‌ ڕه‌فتاری له‌و شێوه‌یه‌ نه‌که‌ن.

هاوکات بۆ هه‌فته‌یه‌که‌ پارێزه‌ری بواری مافه‌کانی مرۆڤ (نه‌سرین ستوده‌) له‌ هه‌مان گرتوخانه‌ی ئه‌ڤیندا هه‌موو جۆره‌ خواردنێکی ڕه‌تکردۆته‌وه‌ وه‌ک ناڕه‌زایی ده‌ربڕین به‌رامبه‌ر ئه‌و به‌د ڕه‌فتاری و پێشێلکاریانه‌ی ده‌سه‌ڵاتدارانی گرتوخانه‌ی ئه‌ڤین به‌رامبه‌ر به‌ زیندانیه‌کان ده‌یکه‌ن. ‌
XS
SM
MD
LG