Accessibility links

داواکاری گشتی ئێران ڕێگه‌ به‌ ئه‌حمه‌دی نه‌ژاد نادات سه‌ردانی ڕاوێژکارێـکی بکات که‌ به‌ندکراوه‌


داواکاری گشتی ده‌وڵه‌تی ئێران ده‌ڵێت مۆڵه‌تی نه‌داوه‌ته‌ سه‌رۆک مه‌حمود ئه‌حمه‌دی نه‌ژاد تاوه‌کو سه‌ردانی ڕاوێژکارێکی بکات که‌ به‌ندکراوه، ئه‌مه‌ش نیشانه‌یه‌کی دیکه‌یه‌ بۆ که‌مبوونه‌وه‌ی توانا و ده‌سه‌ڵاتی سه‌رۆکی ئێران‌.
له‌و باره‌یه‌وه‌ رۆژنامه‌گه‌ری ئێرانی له‌ زاری غولام حوسه‌ین موحسینی ده‌گێڕێته‌وه‌ که‌ ده‌ڵێت داواکاری مه‌حمود ئه‌حمه‌دی نه‌ژادی سه‌رۆکی ئێرانی بۆ ئه‌وه‌ی سه‌ردانی به‌ندیخانه‌ی ئه‌ڤین بکات ، گومانی ئه‌وه‌ی لێده‌کرێت که‌ مه‌به‌ستی سیاسی له‌ پشته‌وه‌ بێت.
ئه‌وه‌ی شایانی گوتنه‌ داواکاری سه‌رۆکی ئێرانی بۆ ئه‌وه‌ی رێگه‌ی پـێبدرێت سه‌ردانی به‌ندیخانه‌ی ناوبراو بکات، دوای ئه‌وه‌ بوو که‌ عه‌لی ئه‌کبه‌ر جه‌وان فه‌قری ڕاوێژکاری باڵای ڕۆژنامه‌وانی سه‌رۆک له‌ مانگی رابردوودا خرایه‌ به‌ندیخانه‌وه‌، به‌ هۆی ئه‌وه‌ی به‌ بڵاوکردنه‌وه‌ی چه‌ند بابه‌تێـک که‌ وه‌ک ده‌ڵێن تیایدا سووکایه‌تی به‌ ڕابه‌ری باڵای ئێرانی ئایه‌توڵا عه‌لی خامه‌نه‌ئی کردووه‌.
سه‌رۆکی ئێرانی پێشتر له‌ لایه‌ن ده‌سه‌ڵاتی ئاینی ئێرانی پشتیوانی لێ ده‌کرا، به‌ڵام ئه‌و پشتیوانیکردنه‌ی له‌ ده‌ست دا، پاش ئه‌وه‌ی له‌ ساڵی رابردوو به‌دی کرا که‌ به‌رهه‌ڵستی عه‌لی خامه‌نه‌ئی ده‌کات.
غولام حوسه‌ین ئاماژه‌ی ئه‌وه‌شی دا که‌ باشتر وایه‌ سه‌رۆکی ئێرانی کار له‌سه‌ر کێشه‌کانی ئابوری وڵات بکات له‌وه‌ی که‌ سه‌ردانی به‌ندیخانه‌ی ئه‌ڤین بکات.
ئه‌وه‌ی جێی ئاماژه‌یه‌ ئه‌م تێبینیـیانه‌ی داواکاری گشتی ئێران، له‌ چه‌ندان له‌ رۆژنامه‌کانی ئه‌مڕۆی وڵاتدا بڵاوکراوه‌.
XS
SM
MD
LG