Accessibility links

کۆشـکی سـپی ئه‌و ڕاپـۆرته‌ ڕه‌تده‌کاته‌وه‌ که‌ ده‌ڵێت ئه‌مه‌ریکا و ئێران ڕێـکه‌وتوون وتووێژی ڕاسته‌وخۆ بکه‌ن


کۆشـکی سـپی ئه‌و ڕاپـۆرته‌ی ڕۆژنامه‌ی نیویۆرک تایمزی ڕه‌تکرده‌وه‌ که‌ تیایدا هاتووه‌ ئه‌مه‌ریکا و ئێران ڕێـکه‌وتوون ته‌نها هه‌ر خۆیان وتووێژی ڕاسـته‌وخۆ بکه‌ن سه‌باره‌ت به‌ به‌رنامه‌ ناوکیـیه‌که‌ی ئێران.
تۆمی ڤیتۆر گوته‌بێژی ئه‌نجومه‌نی ئاسایشی نیشـتیمانی ئه‌مه‌ریکا سه‌ر به‌ کۆشـکی سـپی گوتی ئه‌وه‌ ڕاست نیـیه‌ که‌ ئه‌مه‌ریکا و ئێران ڕێـکه‌وتوون له‌ پاش هه‌ڵبژاردنه‌کانی سه‌رۆکایه‌تی وتووێژی ڕاسـته‌وخۆ بکه‌ن یان هه‌ر وتووێژێـکی دیکه‌ ئه‌نجام بده‌ن.
به‌ڵام گوتی " ئێمه‌ له‌ کارکردن له‌گه‌ڵ پـێنج ئه‌ندامه‌ هه‌میشـیـیه‌که‌ی ئه‌نجومه‌نی ئاسایش و ئه‌ڵمانیا به‌رده‌وام ده‌بین له‌ پـێناو چاره‌سه‌رێـکی دیپـلۆماسی، وه‌ له‌ سه‌ره‌تاوه‌ گوتوومانه‌ ئێمه‌ بۆ وتووێژی دوو قۆڵی ئاماده‌ین."
پاشـان گوتی سه‌رۆک ئۆباما به‌ ڕوون و ئاشـکرایی گوتوویه‌تی ناهێڵێت ئێران بـبێته‌ خاوه‌ن چه‌کی ناوکی و هه‌رچی بۆ ئه‌و مه‌به‌سته‌ پـێوست بێت ده‌یکات.
جێی ئاماژه‌یه‌ ڕۆژنامه‌ی نیویۆرک تایمز دوێنێ شه‌ممه‌ ڕاپـۆرتێـکی بڵاوکرده‌وه‌ و تیایدا هاتووه‌ کاربه‌ده‌سـتان له‌ به‌ڕێوه‌به‌رایه‌تی سه‌رۆک ئۆباما که‌ داوایان کردووه‌ ناویان ئاشـکرا نه‌کرێت گوتوویانه‌ ئه‌مه‌ریکا و ئێران ڕێـکه‌وتوون وتووێژی ڕاسته‌وخۆ بکه‌ن سه‌باره‌ت به‌ به‌رنامه‌ ناوکیـیه‌که‌ی ئێران.
مایکڵ ئۆرین باڵیۆزی ئیسرائیل له‌ ئه‌مه‌ریکا به‌ ڕۆژنامه‌که‌ی گوتووه‌ به‌ڕێوه‌به‌رایه‌تی ئه‌مه‌ریکا هیچی له‌و باره‌یه‌وه‌ به‌ ئیسرائیل نه‌گوتووه‌.
XS
SM
MD
LG