Accessibility links

به‌حره‌ین ده‌ڵێت ده‌بێت ئۆپزسیۆن ئیدانه‌ی توندوتیژی بکات


وه‌زیرێکی کابینه‌ی حکومه‌تی به‌حره‌ین ده‌ڵێت پێویسته‌ لایه‌نه‌کانی ئۆپزسیۆن له‌ به‌حره‌ین ئیدانه‌ی توندوتیژیه‌کان بکه‌ن تا خواستی خۆیان نیشان بده‌ن بۆ به‌ره‌وپێشچونی سیاسیانه‌.
ئه‌م ڕاگه‌یاندنانه‌ی شێخ خالد بن عه‌لی ئال خه‌لیفه‌ وه‌زیری دادی به‌حره‌ین دوابه‌دوای کۆبوونه‌وه‌که‌ی هات له‌گه‌ڵ ئه‌و لایه‌نانه‌ی ئۆپزسیۆندا که‌ په‌یوه‌ندییان هه‌بووه‌ به‌ خۆپیشاندانه‌کانی ساڵی ڕابردووی شانشینی به‌حره‌ینه‌وه‌.
وه‌زیری دادی به‌حره‌ین ده‌ڵێت ده‌بێت لایه‌نه‌کانی ئۆپزسیۆن هه‌ڵوێستی ڕوون و ئاشکرا و بێ چه‌ندوچوونی خۆیان ڕابگه‌یه‌نن، به‌بێ ئه‌وه‌ی بیانوی سیاسی به‌کاربهێنن بۆ په‌رده‌پۆشکردنی تاوانه‌کان، هه‌روه‌ها داوای ئه‌وشی کردووه‌ لایه‌نه‌ سیاسیه‌کان ڕۆڵی هێورکردنه‌وه‌ بگێڕن له‌ پێناو زه‌مینه‌ خۆشکردن بۆ تێگه‌یشتنی هاوبه‌شی سیاسیانه‌ له‌ به‌حره‌یندا.
هاوکات دادگایه‌کی سیڤیلی به‌حره‌ین ئه‌و سزایه‌ی له‌سه‌ر 11 که‌س هه‌بوون که‌مکردۆته‌وه.
ئه‌و یازده‌ که‌سه‌ گوناهبار بوون به‌ هێرشکردنه‌ سه‌ر سه‌ربازێک له‌ ده‌می خۆپیشاندانه‌کانی ساڵی پاری به‌حره‌یندا.
هه‌ر یه‌کێک له‌و گوناهبار کراوانه‌ سزای 15 ساڵیان له‌سه‌ر بووه‌ و دادگا ده‌ڵێت به‌پێی یاسا پێویسته‌ ئه‌و گوناهبار کراوانه‌ له‌ 6 مانگ بۆ 2 ساڵ زیندانیکردن سزا بدرێن ، نه‌ک به‌و شێوه‌یه‌ی دادگای له‌شکری به‌حره‌ین سزای داون.
XS
SM
MD
LG