Accessibility links

سه‌رهه‌ڵـداوانی سوریا له‌ گه‌ڕه‌کی سه‌ڵاحه‌دینی حه‌له‌ب ده‌کشێنه‌وه‌


سه‌رهه‌ڵـداوانی سوریا ئه‌مڕۆ پـێـنجشه‌ممه‌ له‌ گه‌ڕه‌کی سه‌ڵاحه‌دینی شـاری حه‌له‌ب کشـاونه‌ته‌وه‌ و ده‌ڵێن هێزه‌کانی حکومه‌ت بۆردومانێـکی هه‌ڕه‌مه‌کی و زۆر توندی ناوچه‌که‌یان کردووه‌.
چه‌ند فه‌رمانده‌یه‌کی له‌شـکری سوریای ئازاد هه‌واڵه‌که‌یان پـشـتڕاسـتکردووه‌ته‌وه‌ و ده‌ڵێن کشانه‌وه‌که‌یان کشانه‌وه‌یه‌کی تاکتیکیـیه‌.
به‌ڵام په‌یامنێری که‌ناڵی جه‌زیره‌ ده‌ڵێت هێزه‌کانی ئۆپـۆزسیۆن به‌ ته‌واوی له‌و گه‌ڕه‌که‌ کشـاونه‌ته‌وه‌ پاش ئه‌وه‌ی ته‌قه‌مه‌نیـیان لێ‌بڕا و حکومه‌ت به‌ توندی به‌ تانک و تۆپ و هه‌لیکۆپـته‌ر و فڕۆکه‌ی جه‌نگی لێی ده‌دان.
په‌یامنێره‌که‌ له‌ درێژه‌ی قسه‌کانیدا ده‌ڵێت تۆڕه‌یی و بێزاری سه‌رهه‌ڵـداوان و خه‌ڵکه‌که‌ی گرتووه‌ته‌وه‌ له‌سه‌ر ئه‌وه‌ی وه‌ک پـێویست له‌ لایه‌ن ئه‌نجومه‌نی نیشـتیمانی ئۆپـۆزسیۆن و هه‌روه‌ها وڵاته‌ عه‌ره‌بـیـیه‌کان پـشـتیوانیـیان لێ‌نه‌کراوه‌.
چالاکوانان ده‌ڵێن هه‌ر له‌ شه‌ڕوپـێـکدادانی دوو ڕۆژی ڕابردوو به‌ ده‌یان که‌س کوژراون و هه‌روه‌ها به‌ ده‌یان باڵه‌خانه‌ له‌ گه‌ڕه‌کی سه‌ڵاحه‌دین به‌هۆی بۆردومانه‌کان وێران بوون.
له‌ لایه‌کی دیکه‌وه‌ حکومه‌تی سوریا ده‌ڵێت هه‌ڵمه‌تی گرتنه‌وه‌ی گه‌ڕه‌کی سه‌ڵاحه‌دین کۆتایی پـێـهات و ئێسـتا به‌ره‌و گه‌ڕه‌کی سوکه‌ری هێزه‌کانیان پـێشـڕه‌وی ده‌که‌ن.
XS
SM
MD
LG